قابض مافیا سے چھٹکارا حاصل کیئے بغیر ہاکی معاملات درست نہیں ہو سکتے۔نوید عالم

بورے والا(چوہدری اصغر علی جاوید سے)پاکستان ہاکی فیڈریشن کے سابق سیکرٹری اولمپیئن نوید عالم نے کہا ہے کہ پاکستان ہاکی فیڈریشن پر (40)سال سے قابض مافیا سے چھٹکارا حاصل کیئے بغیر ہاکی معاملات درست نہیں ہو سکتے،ان خیالات کا اظہار انہوں گذشتہ روز گورنمنٹ ماڈل ہائی سکول بورے والا میں نمائشی ہاکی میچ کے بعد میڈیا کے نمائندوں سے گفتگو کرتے ہوئے کیا انہوں نے کہا کہ ہاکی فیڈریشن کے موجودہ عہدیداروں کو ہاکی کے معاملات کو درست سمت لانے کے لیے لایا گیا تھا لیکن انہوں نے بھی ایک دوسرے کی کرپشن چھپانے کے لیے این آر او کر لیا ان باتوں کا نوٹس لیتے ہوئے قائمہ کمیٹی نے ہاکی فیڈریشن کے عہدیداروں کو طلب کیا لیکن وہ ان کے سوالوں کا تسلی بخش جواب نہ دے پائے جس پر قائمہ کمیٹی نے ہاکی فیڈریشن کے عہدیداروں کو فارغ کرنے اور بے ضابطگیوں کے معاملات کو ایف آئی اے کو بھیجنے کی ہدایت کی تھی نوید عالم نے کہا کہ ہاکی فیڈریشن کے سیکرٹری جو کہ قومی ہاکی ٹیم کے سابق کپتان شہباز سینئر کو فارغ کر کے ان کی جگہ کسی اور کو سیکرٹری بنا دیا گیا جب شہباز سینئر سے پوچھا گیا تو انہوں نے کہا کہ اس نے کوئی استعفیٰ نہیں دیا بلکہ یہ پہلی مرتبہ ایسا ہوا کہ الیکشن کی بجائے ویڈیو میسج کے ذریعے سیکرٹری بنایا گیا انہوں نے کہا کہ (2008) سے (2015) تک فیڈریشن کے عہدوں پر قابض دو تین افراد اپنی کارکردگی تو بتائیں کہ انہوں نے ہاکی کی ترقی کے لیے کیا اقدامات کئے ہیں لیکن وہ ہاکی کی ناقص کارکردگی کی ذمہ داری قبول کرتے ہوئے عہدوں سے علیحدہ ہو جائیں لیکن وہ عہدوں کی خاطر قومی کھیل کا دنیا بھر میں تماشا بنتے دیکھتے رہے نوید عالم نے کہا کہ خواتین ہاکی میں ہراسمنٹ کا کے واقعات دیکھ کر انہیں بہت دکھ ہوا سابق سیکریٹری پی ایچ ایف نے کہا کہ شیخ اسلم جیسے ہاکی آرگنائزر قابل قدر ہیں جوکہ گذشتہ (45) سال سے ہاکی کے ٹورنامنٹ کا انعقاد کر کے اس کھیل کو زندہ رکھا ہوا ہے اور وہ ان کی اور کھلاڑیوں کی حوصلہ افزائی کے لیے حاضر ہوئے ہیں ملک میں ہاکی کا کھیل دوبارہ عروج پر جائے گا اور گراس روٹ لیول پر کھلاڑیوں کی ہر ممکن حوصلہ افزائی بھی ہو گی۔