حکومت احتساب کا نعرہ لگا کر اقتدار میں آئی ہے،احتساب کا عمل بلاتفریق جاری رہے گا۔ڈاکٹر اختر ملک
بورے والا(چوہدری اصغر علی جاوید سے)صوبائی وزیر توانائی برقیات پنجاب ڈاکٹر اختر ملک نے کہا ہے کہ حکومت احتساب کا نعرہ لگا کر اقتدار میں آئی ہے،احتساب کا عمل بلاتفریق جاری ہے یہی وجہ ہے کہ سینئر صوبائی وزیر علیم خان کو نیب نے گرفتار کر کے تحقیقات شروع کر دی ہے،مسلم لیگ(ن) کی قیادت اپنے اعمال اور لوٹ مار کے باعث احتساب کے شکنجے میں ہے،حکومت قومی لٹیروں سے کسی صورت بھی این آر او نہیں کرے گی جس کا واضح اظہار وزیر اعظم پاکستان عمران خان بارہا قو م کے سامنے کر چکے ہیں،ان خیالات کا اظہار انہوں نے پیپلز پارٹی کے راہنما کرنل(ر) راﺅ عابد علی خان کی رسم چہلم کے بعد انکے رہائش گاہ مجاہد کالونی میں میڈیا سے گفتگو کرتے ہوئے کیا صوبائی وزیر ڈاکٹر اختر ملک نے مرحوم کے صاحبزادے راﺅ ضیاء الرحمان اور دیگر اہل خانہ سے کرنل(ر) راﺅ عابد علی خان کی وفات پر اظہار تعزیت کرتے ہوئے مرحوم کے لیے دعائے مغفرت کی اس موقع پر پیپلز پارٹی کے راہنما کیپٹن (ر)محمد اسماعیل چوہدری،وائس پرنسپل گورنمنٹ کالج بورے والا پروفیسر راشد سدھو،چوہدری عبدالجبار شاکر،چاچا غلام حیدر جٹ اور رانا شاہد محمود بھی موجود تھے ڈاکٹر اختر ملک نے کہا کہ حکومت توانائی اور گیس کے بحران پر قابو پانے کے لیے ٹھوس عملی اقدامات کر رہی ہے جلد ہی بورے والا کے قریب 26 کروڑ روپے کی لاگت سے سولر انرجی پلانٹ کا سنگ بنیاد رکھا جائے گا انہوں نے بتایا کہ سوئی سدرن اور سوئی گیس کے ایم ڈیز کی برطرفی سے ثابت ہو چکا ہے کہ بیوروکریسی میں ایس اہم سیٹوں پر تعینات افسران حکومت کے خلاف سازشیں کر کے مصنوعی بحران پیدا کر رہے تھے انہوں نے یقین دلایا کہ مارچ میں موسم بہتر ہونے کے بعد قدرتی گیس کی سپلائی معمول پر آجائے گی صوبائی وزیر توانائی ڈاکٹر اختر ملک نے اچانک تھانہ گگو کا بھی معائنہ کیا اور وہاں پر موجود لوگوں سے پولیس کی کارکردگی کے بارے میں معلومات حاصل کیں اور کہا کہ حکومت کی طرف سے پولیس کلچر میں تبدیلی کے مثبت اثرات سامنے آ رہے ہیں وزیر اعلیٰ پنجاب عثمان بزدار صوبائی کابینہ کے اجلاس میں پولیس کے خلاف ملنے والی شکایات کا سخت نوٹس لیتے ہیں اس موقع پر حلقہ کے ایم این اے چوہدری محمد یوسف کسیلیہ،چیئرمین یونین کونسل چوہدری ارشاد احمد چوہان اور ایس ایچ او شمعون جوئیہ بھی موجو د تھے۔
About Author
