گیس کی بدترین لوڈشیڈنگ،24گھنٹوں میں 4گھنٹے گیس کی فراہمی،پریشر انتہائی کم

بورے والا(چوہدری اصغر علی جاوید سے)گیس کی بدترین لوڈشیڈنگ،24گھنٹوں میں 4گھنٹے گیس کی فراہمی،پریشر انتہائی کم،معمولات زندگی مفلوج ہو گئے،شہری لکڑیاں اور ایل پی جی گیس چلانے پر مجبور،ایل پی جی گیس ڈیلرز کی نا جائز منافع خوری،شہری تنظیموں نے گیس کی بلا تعطل فراہمی کے لیے محکمہ سوئی گیس کو 48گھنٹے کا الٹی میٹم دے دیا،صورت حال بہتر نہ ہونے پر شہر میں مکمل شٹر ڈاﺅن اور سوئی گیس آفس کا گھیراﺅ کیا جائے گا،مشتر کہ اعلامیہ،تفصیلات کے مطابق شہر اور گردونواح میں گذشتہ کئی روز سے جاری سوئی گیس کی بدترین لوڈشیڈنگ اور کم پریشر کی وجہ سے گھریلو معمولات بری طرح مفلوج ہو کر رہ گئے ہیں 24گھنٹوں میں صرف 4گھنٹے گیس فراہمی اور وہ بھی کم پریشر ہونے کی وجہ سے گھروں میں کھانا پکانے اور دیگر معمولات کے لیے لکڑیاں جلانے اور مقررہ نرخوں سے زائد قیمت پر ایل پی جی گیس سلنڈر خریدنا مجبوری بن چکا ہے محکمہ سوئی گیس سپلائی کرتا ہے لیکن اکثر علاقوں میں ان 4گھنٹوں کے دوران بھی کم پریشر کی وجہ سے کھانا پکانا مشکل ہو چکا ہے ایل پی جی گیس ڈیلرز نے بھی اس صورتحال کی فائدہ اٹھاتے ہوئے مقررہ نرخوں سے زائد مہنگی گیس فروخت کر کے شہریوں کو لوٹنا شروع کر دیا ہے اس افسوسناک صورتحال پر انجمن تاجران ضلع وہاڑی کے صدر محمد جمیل بھٹی،جنرل سیکرٹری چوہدری صغیر رامے،کریانہ ایسوسی ایشن کے صدر راﺅ نور محمد،سول سوسائٹی نیٹ ورک کے کنونیئر عبدالرﺅف چوہدری،صدر انسانی حقوق کمیٹی حاجی محمد رحمان کھوکھر اور دیگر سیاسی سماجی مذہبی و کاروباری تنظیموں نے انتباہ کیا ہے کہ اگر 48گھنٹوں میں گیس کی بلا تعطل فراہمی یقینی نہ بنائی گئی تو شہر میں مکمل شٹرڈاﺅن ہڑتال کر کے محکمہ سوئی گیس کے خلاف احتجاجی مظاہرے کیے جائیں گے اور سوئی گیس آفس کا گھیراﺅ بھی کیا جائے گا۔