سبزیاں،فروٹ اور دیگر کھانے پینے کی اشیاء کے من مانے ریٹ مقرر،ضلعی و تحصیل انتظامیہ خاموش

بورے والا(چوہدری اصغر علی جاوید سے)مارکیٹ کمیٹی،ضلعی و تحصیل انتظامیہ نے شہریوں کو ناجائز منافع خوروں کے رحم و کرم پر چھوڑ دیا،سبزیاں،فروٹ،برائلر اور دیگر کھانے پینے کی اشیاء کے من مانے ریٹ مقرر،مارکیٹ کمیٹی کے جاری کردہ نرخنامے ردی کی ٹوکری میں پھینک دیئے،ناجائز منافع خوروں نے شہریوں کو دونوں ہاتھوں سے لوٹنا شروع کر دیا،ناجائز منافع خوروں کے خلاف قانون پر عملدرآمد خواب بن گیا،شہریوں کا ناجائز منافع خوری پر فوری نوٹس لینے کا مطالبہ،تفصیلات کے مطابق موجودہ حکومت کے آتے ہی سابقہ حکومت کے تعینات کرد ہ ضلعی و تحصیل سطح کے انتظامی افسران نے اپنے متوقع تبادلوں کے انتظار میں شہریوں کو بد ترین منافع خوری کرنے والوں کے رحم و کرم پر چھوڑ دیا ہے جو کہ سبزیوں،فروٹ،برائلر،مٹن،بیف سمیت دیگر کھانے پینے کی اشیاء کے مارکیٹ کمیٹی کی جانب سے جاری کردہ نرخناموں کو ردی کی ٹوکری میں پھینک کر شہریوں کو دونوں ہاتھوں سے لوٹ رہے ہیں انکے خلاف شکایات سننے والا کوئی ادارہ اپنی ذمہ داری پوری نہیں کر رہا ہے صبح سے شام تک قیمتوں کو کنٹرول کرنے کے ذمہ دار اہلکاران ایئر کنڈیشنڈ کمروں میں بیٹھ کر شہریوں کی بے بسی کا تماشا دیکھ رہے ہیں ناجائز منافع خوروں سے قیمتیں پوچھنے پر وہ شہریوں سے بدسلوکی بھی کرتے ہیں اس صورتحال میں شہری جو تبدیلی کی امید لگائے بیٹے تھے شدید مایوسی اور بے بسی کا شکار نظر آرہے ہیں مقامی نمائندہ شہریوں سید سجاد حسین بخاری،حافظ محمد عثمان،حافظ ابو سفیان حنفی،حاجی عبدالغفور،محمد شیر خاں کھچی،محمد لطیف خلجی اور دیگر نمائندہ شخصیات نے وزیر اعلیٰ پنجاب سے فوری نوٹس لینے کا مطالبہ کیا ہے۔