شام میں جنگ بندی کیلئے مسلم حکمرانوں کو میدان میں آنا ہو گا۔حافظ ابوسفیان حنفی

بورے والا(چوہدری اصغر علی جاوید سے)صوبائی نائب صدر علماء کونسل اور ممبر اتحاد بین المسلمین کمیٹی حکومت پنجاب حافظ محمد ابوسفیان حنفی نے کہا ہے کہ شام میں جاری انسانیت سوز مظالم پر امن کے دعویداروں کی خاموشی افسوسناک ہے،معصوم بچوں اور خواتین کا قتل عام کر کے جنگی جرائم کا ارتکاب کیا جا رہا ہے،ان خیالات کا اظہار انہوں نے میڈیا کے نمائندوں سے گفتگو کرتے ہوئے کیا حافظ محمد ابوسفیان حنفی نے کہا کہ امت مسلمہ کے حوالے سے اقوام متحدہ سمیت عالمی برادری کا کردار ہمیشہ جانبدارانہ رہا بارود کی بارش برسا کر بستیوں کی بستیاں تباہ کی جا رہی ہیں کیمیائی ہتھیار استعمال ہو رہے ہیں لیکن انسانی حقوق کے نام نہاد چیمپئن خاموش تماشائی کا کردار ادا کر رہے ہیں انہوں نے کہا کہ شام میں جنگ بندی کیلئے مسلم حکمرانوں کو میدان میں آنا ہو گا بطور خاص پاکستان اور ترکی کو اس سلسلے میں قائدانہ کردار ادا کرنا چاہئے اور سسکتے ہوئے مظلوم مسلمانوں کی داد رسی کرنی چاہئے صوبائی نائب صدر پنجاب نے کہا کہ گزشتہ ایک ماہ میں سینکڑوں بچوں سمیت ہزاروں افراد کو شہید کر دیا گیا لیکن کسی کے کان پر جوں تک نہیں رینگی ہم شام کے مسلمانوں کے ساتھ یکجہتی کا اظہار کرتے ہیں اور حکومت پاکستان اور اقوام متحدہ سمیت تمام عالمی برادری سے مطالبہ کرتے ہیں کہ اس مسئلے کا فوری حل تلاش کیا جائے اور مسلمانوں کی نسل کشی بند کی جائے شام میں جاری انسانی بحران کا واحد حل بشار الاسد جیسے ظالم سے نجات میں ہے اسے فوری ہٹایا جائے اور لوگوں کو امداد پہنچائی جائے تاکہ انسانی جانوں کے ضیاع کو روکا جا سکے۔