شادی کی تقریب میں اندھا دھند ہوائی فائرنگ،چھت پر کھڑا نوجوان سر میں گولی لگنے سے جاں بحق
بورے والا(چوہدری اصغر علی جاوید سے)نواحی آبادی 435ای بی میں شادی کی تقریب میں اندھا دھند ہوائی فائرنگ،چھت پر کھڑا نوجوان سر میں گولی لگنے سے جاں بحق،فائرنگ کے واقعہ پر آر پی او ملتان کا نوٹس،ایس ایچ او تھانہ سٹی معطل اور ضلع بدر،ڈی ایس پی سے جواب طلب،ڈی پی او وہاڑی موقع پر پہنچ گئے،ملزمان فرار ہو گئے،تفصیلات کے مطابق نواحی آبادی 435ای بی میں محمد سلیم بٹ نامی شخص کی بہن کی شادی میں باراتیوں نے انکے گھر کے باہر آتے ہی اندھا دھند ہوائی فائرنگ شروع کر دی اسی دوران اسی گلی کا رہائشی نوجوان عابد ولد عبدالعزیز اپنی چھت پر کھڑا تھا کہ ایک گولی اسکے سر پر لگی اور وہ گولی لگنے سے نیچے گر پڑا اور موقع پر ہی دم توڑ گیا جبکہ اس واقعہ کے بعد وہاں بھگڈر مچ گئی فائرنگ کرنے والے باراتی موقع سے فرار ہو گئے واقعہ کی اطلاع ملتے ہی آر پی او ملتان محمد ادریس نے اس کا فوری نوٹس لیتے ہوئے ایس ایچ او تھانہ سٹی محمد فیضان قیوم کو معطل اور ضلع بدر کر کے ڈی ایس پی بورے والا سے جواب طلب کر لیا آر پی او ملتان نے ڈی ایس پی کرائم برانچ ملتان منصور احمد خاں کو انکوائری آفیسر مقرر کرتے ہوئے سات یوم میں اسکی رپورٹ طلب کر لی ہے ڈی پی او وہاڑی عمر سعید ملک بھی اس واقعہ کی اطلاع ملتے ہی نواحی گاﺅں 435ای بی میں پہنچ گئے اور ملزمان کی فوری گرفتاری کے لیے مختلف ٹیمیں روانہ کر دیں بعدازاں ڈی پی او وہاڑی نے ٹی ایچ کیو بورے والا جا کر مقتول کے ورثاء کو مکمل انصاف کی فراہمی کا یقین دلایا مرنے والے 25سالہ نوجوان عابد انصاری بیوہ ماں کا سہارا تھا جس کی ایک سال قبل ہی شادی ہوئی تھی ڈی پی او وہاڑی عمر سعید ملک نے غمزدہ خاندان کو ہر قیمت پر انصاف کی فراہمی کا یقین دلاتے ہوئے پولیس کو ہدایت کی کہ دولہا بابر بٹ،اسکے والد اور فائرنگ کرنے والے تمام ملزمان کو گرفتاری کو یقینی بنایا جائے اور وقوعہ کے بارے میں پولیس کی مدعیت میں دہشت گردی ایکٹ کے تحت مقدمہ درج کیا جائے انہوں نے مزید کہا کہ آئندہ کیس بھی تھانہ کی حدود میں شادی پر فائرنگ کا تدارک نہ کرنے پر متعلقہ تھانہ کے ایس ایچ او کو فارغ کر دیا جائے گا ذرائع سے معلوم ہوا ہے کہ پولیس نے واقعہ میں ملوث سابق کونسلر فیض احمد ڈوگر سمیت دیگر 7افراد کو حراست میں لیکر تفتیش شروع کر دی ہے مقامی لوگوں اور نمائندہ شہریوں نے اس واقعہ پر شدید ردِ عمل کا اظہار کرتے ہوئے اسے پولیس کی غفلت اور لاپرواہی قرار دیا شہریوں نے الزام عائد کیا کہ گذشتہ کئی ماہ سے شہر اور نواحی آبادیوں میں شادی بیاہ کی تقریبات میں ہوائی فائرنگ،آتش بازی اور رقص و سرور کی محفلیں پولیس کو اعتماد میں لیے بغیر ممکن نہیں شہریوں کی شکایات کے باوجود قانون شکنی معمول بن چکی ہے۔
About Author
