غیر ملکی قرضوں کی وجہ سے پاکستان کی معیشت کی سانسیں بند ہو رہی ہیں۔عمران ستار

بورے والا(چوہدری اصغر علی جاوید سے)ساہیوال ٹیکس بار ایسوسی ایشن کے نائب صدر چوہدری عمران ستار ایڈووکیٹ نے کہا ہے کہ غیر ملکی قرضوں کی وجہ سے پاکستان کی معیشت کی سانسیں بند ہو رہی ہیں اور اگر یہی صورتحال برقرار رہی تو ہماری مشکلات میں مزید اضافہ ہو گا اس وقت سب کو اپنی اپنی سیاست کو پس پشت ڈالتے ہوئے صرف اور صرف قومی سوچ اپنانی چاہیے بصورت دیگر ہمارے پاس سوائے پچھتاوے کے کچھ نہیں بچے گا پاکستان کے موجودہ معاشی حالات،ہماری پالیسیوں اور سمت سے ہرگز یہ نہیں لگتا کہ آنے والے چند سالوں میں ہم آئی ایم ایف سے چھٹکارہ حاصل کر سکیں یا عام آدمی سکھ کا سانس لے سکے،بیرونی قرضوں کی ادائیگی کا بوجھ اور معیشت کی سست روی نے حالات کو مزید گھمبیر کر دیا ہے آنے والے دنوں میں حکومت آئی ایم ایف کے ساتھ ایک اور معاہدہ کرنے جا رہی ہے جس کے بعد عام آدمی کی زندگی مزید مشکل ہو جائے گی حکومت کو چاہیے کہ آئی ایم ایف کی شرائط کو من و عن قبول کرنے کی بجائے عوامی مشکلات کو مد نظر رکھتے ہوئے معیشت کی بحالی کیلئے ماہرین معیشت اور ٹیکس ماہرین کی ایک ٹیم بنائی جائے جو اس معاہدے کیلئے حکومت کی معاونت کرے،ان خیالات کا اظہار انہوں نے گزشتہ روز میڈیا کے نمائندوں سے گفتگو کرتے ہوئے کیا چوہدری عمران ستار ایڈووکیٹ نے کہا کہ پاکستان کو غیر ملکی قرضوں سے چھٹکار حاصل کرنے کیلئے برآمدات پر توجہ مرکوز کرنے کے ساتھ ساتھ ٹیکس نظام کو بہتر بنانے کی ضرورت ہے ہمارا ٹیکس کا نظام فرسودہ ہو چکا ہے اس جدید ٹیکنالوجی کے دور میں ہمیں ڈیجیٹلایزیشن اور ڈاکومینٹیشن کی ضرورت ہے اور آرٹیفیشل انٹیلیجنس کے اس دور میں کچھ بھی مشکل نہیں ایک سوال کے جواب میں مزید کہا کہ زیادہ سے زیادہ لوگوں کو ٹیکس نیٹ میں لانے کیلئے حکومت کو چاہئے کہ ٹیکس ریٹ میں کمی کرے اور پہلے سے ٹیکس ادا کرنے والے لوگوں پر مزید بوجھ ڈالنے کی بجائے نئے لوگوں کو ٹیکس نیٹ میں لانے کیلئے ٹیکنالوجی کا استعمال کیا جائے اور ان ڈائریکٹ ٹیکسز میں کمی کر کے عام آدمی کی زندگی آسان کی جائے پاکستان میں ایسے لوگ موجود ہیں جو پاکستان کا قرض اتارنے کی منصوبہ بندی اور حکمت عملی مرتب کرنے میں حکومت کو بہترین تجاویز پیش کر سکتےہیں۔