میڈیکل انٹری ٹیسٹ میں لاکھوں طلباء و طالبات کے مستقبل سے کھیلنے والے کسی رعایت کے مستحق نہیں ۔ سید تنویر احمد شاہ

بورے والا(چوہدری اصغر علی جاوید سے)انجمن بہبود اساتذہ پاکستان کے مرکزی صدر سابق صوبائی جنرل سیکرٹری پی پی ایل اے پنجاب پروفیسر سید تنویر احمد شاہ نے کہا ہے کہ انٹری ٹیسٹ میں لاکھوں طلباء و طالبات کے مستقبل سے کھیلنے والے کسی رعایت کے مستحق نہیں،میڈیکل انٹری ٹیسٹ میں طلباء و طالبات سے یہ کھلواڑ نجانے کب سے ہو رہا تھا اس ظالمانہ امتحان کی وجہ سے غریب طلباء و طالبات اعلیٰ نمبروں کے باوجود داخلوں سے اس لئے محروم رہ جاتے تھے کہ امراء کے بچے انٹری ٹیسٹ کے لیک ہونے والے امتحانی پرچے پہلے سے حاصل کر لیتے تھے میڈیکل کالجز میں داخلے کے لئے اس امتحانی نظام کی وجہ یہ تھی کہ حکومت کو اپنے تعلیمی بورڈ کے تحت ہونیوالے امتحانات پر اعتماد نہیں رہا تھا جو کہ حکومتی اداروں کی ناکامی ہے اس بڑے سکینڈل کے منظر عام پر آنے کے بعد اب انٹری ٹیسٹ کا کوئی جواز باقی نہیں رہتا اس کرپشن سکینڈل نے میڈیکل کالجز اور پرائیویٹ کالجز میں داخل ہونے والے طلباء کا مستقبل بھی داﺅ پر لگا دیا ہے حکومت اپنے تعلمی بورڈز کے امتحانی نظام کو مذید مضبوط بنانے کی بجائے اس انٹری ٹیسٹ کے ذریعہ جہاں غریب اور عام آدمی کے ذہین بچوں کے مستقبل سے کھیل رہی تھی وہاں سالانہ انٹری ٹیسٹ کی مد میں کروڑوں روپے کما رہی تھی حکومت کے قائم کردہ اس امتحانی نظام کا پردہ چاک ہو چکا ہے،ان خیالات کا اظہار انہوں نے سابق جنرل سیکرٹری پی پی ایل اے ملتان ڈویژن ممتاز ماہر تعلیم پروفیسر جاوید اقبال خاں کی رہائش گاہ پر مقامی اخبار نویسوں سے گفتگو کرتے ہوئے کیا انہوں نے کہا کہ انٹری ٹیسٹ سکینڈل میں ملوث افراد کو کڑی سے کڑی سزا دیکر عبرت کا نشان بنایا جائے جو لاکھوں طلباء و طالبات کے مستقبل سے کھیلتے آ رہے تھے اور انہوں نے انٹری ٹیسٹ کو فوری طور پر ختم کرنے کا مطالبہ کیا ہے۔