کسان اتحاد کسانوں کی نمائندگی کی بجائے میپکو کا معاشی استحصال کر رہا ہے۔ایکسئین فیاض کھوکھر

بورے والا(چوہدری اصغر علی جاوید سے)ایکسیئن میپکو فیاض احمد کھوکھر نے کہا ہے کہ کسان اتحاد کسانوں کی نمائندگی کی بجائے واپڈا کا معاشی استحصال کر رہا ہے،میپکو سرکل وہاڑی میں کسان اتحاد کے ذمہ 2 ارب سے زائد کے واجبات واجب الادا ہیں اس سال 50 کروڑ میں سے 34 کروڑ روپے کے بل بورے والا کے کسانوں کے ذمہ واجب الادا ہیں اس خطیر رقم کی عدم ادائیگی کی وجہ سے میپکو مالی بحران کا شکار ہے کسانوں کے جائز کام کرنا ہماری ذمہ داری ہے لیکن کسان اتحاد کا نام استعمال کر کے کسی کو بجلی چوری نہیں کرنے دی جائے گی اور بجلی کے بلوں کی وصولی ہر ممکن یقینی بنائی جائے گی میپکو نے جو بھی میٹر منقطع کئے تھے انکے ذمہ بل واجب الادا تھے اور یہ کبھی نہیں ہونے دیا جائے گا کہ کوئی صارف بجلی استعمال کرے اور بل جمع نہ کروائے واپڈا اپنے صارفین کو بجلی کی ہر ممکن فراہمی کیلئے اپنے تمام تر وسائل بروئے کار لا رہا ہے لیکن اربوں روپے کے واجبات کی عدم ادائیگی سے دیگر صارفین کو دی جانے والی سہولیات بھی متاثر ہو رہی ہیں اگر کسانوں کے ذمہ واجبات کی وصولی ہو جائے تو میپکو اپنے سسٹم کو مزید ”اپ گریڈ“ کر کے صارفین کو درپیش مشکلات میں مزید کمی کر سکتا ہے،ان خیالات کا اظہار انہوں نے اپنے دفتر میں کسان اتحاد کے احتجاج کے حوالہ سے مذاکرات کے دوران کسان راہنماﺅں اور میڈیا سے گفتگو کرتے ہوئے کیا انہوں نے کہا کہ کسان ہمارے ملک کی ریڑھ کی ہڈی کی حیثیت رکھتا ہے اور حکومت کسانوں کو ہر ممکن سہولیات فراہم کرنے کیلئے کوشاں ہے لیکن کسانوں کے نام پر میپکو کا معاشی استحصال قابل تشویش ہے۔