کسانوں کی واپڈا کے خلاف ریلی،بجلی کا ہر صارف اب کسان اتحاد کا ممبر ہو گا۔ملک ذوالفقار اعوان
بورے والا(چوہدری اصغر علی جاوید سے)بلوں کی ادائیگی کے باوجود ٹیوب ویل میٹرز کی بندش اور بھاری ڈیٹکشن کے خلاف کسان اتحاد کی ریلی اور دھرنا،کسانوں نے مطالبات کے حق میں میپکو کمپلیکس کے باہر احتجاجی دھرنا دیا،بجلی کا ہر صارف اب کسان اتحاد کا ممبر ہو گا،دھرنے کی وجہ سے دفاتر آئے درجنوں صارفین اور عملہ محصور ہو کر رہ گیا،تین گھنٹے دھرنے کے بعد ایکسئین میپکو کے دھرنے کے شرکاء کو جائز مطالبات منظور کرنے کی یقین دہانی،تفصیلات کے مطابق پاکستان کسان اتحاد نے کسانوں کے ٹیوب ویل کنکشن بلوں کی ادائیگی کے باوجود بند کرنے اور بلاجواز ایوریج بل بھیجنے کے خلاف ضلعی صدر ملک ذوالفقار اعوان کی قیادت میں سینکڑوں کسانوں نے احتجاجی ریلی نکالی اور میپکو کمپلیکس وہاڑی بازار کے مین گیٹ پر احتجاجی دھرنا دیا احتجاجی دھرنا تین گھنٹے تک جاری رہا جسکی وجہ سے دفتر میں آنے والے درجنوں صارفین اور عملہ اندر محصور ہو کر رہ گیا جبکہ دھرنے کے شرکاء سے خطاب کرتے ہوئے ضلعی صدر ملک ذوالفقار اعوان،تحصیل صدر ندیم اقبال اور جنرل سیکرٹری چوہدری مہران علی نے کہا کہ واپڈا کسانوں کے ساتھ یزید کا کردار ادا کر رہا ہے کسانوں کے بل ادا کرنے کے باوجود ایک ہفتہ سے میٹر بند کر دیئے گئے ہیں جس سے کسانوں کی زمینیں خشک سالی کا شکار ہیں لاکھوں روپے کی فصلیں تباہ ہو رہی ہیں ہمارے ٹیکسوں سے تنخواہیں لینے والوں نے واپڈا کو یونین کے نام پر سیاست کا گڑھ بنا کر یرغمال بنا رکھا ہے اور دفاتر میں اپنی یونین کی فلیکسیں لگا کر انہیں سینما گھر بنا دیا ہے کسانوں کا استحصال کیا جا رہا ہے لیکن ہمارے ٹیکسوں سے تنخواہیں لینے والے دفاتر میں بیٹھ کر سیاست کرتے ہوئے فرعون بنے بیٹھے ہیں اگر کسان دشمنی نہ چھوڑی گئی تو 25 ستمبر کو بھرپور طاقت کا مظاہرہ کرتے ہوئے اپنے حقوق کے حصول تک احتجاج کریں گے واپڈا کے کرپٹ افسران کے گھروں میں بجلی چوری سے ہزاروں یونٹ ماہانہ چوری کئے جا رہے ہیں اور انکا بوجھ کسانوں پر ڈالا جا رہا ہے ہمارے کنکشن فوری بحال کر کے مطالبات پورے کئے جائیں واپڈا ملازمین کی فری بجلی ختم کی جائے انکے اثاثہ جات کی جانچ پڑتال کی جائے اور ہمارے صبر کا امتحان نہ لیا جائے ہم اب اسلام آباد کی طرف مارچ کرنے پر مجبور ہو چکے ہیں کسان اتحاد ہر شہری کی نمائندگی کر رہا ہے اور بجلی کاہر صارف اب کسان اتحاد کا ممبر ہو گا جنکے حقوق کا تحفظ اور ان سے ہونے والے ہر ظلم و زیادتی کا ازالہ ہماری ذمہ داری ہے چیف جسٹس اور آرمی چیف ہمارے ساتھ ہونے والی زیادتیوں کا فوری نوٹس لیں کسانوں کے طویل دھرنے کی وجہ سے وہاڑی بازار میں ٹریفک مکمل جام ہو کر رہ گئی تاہم ایس ایچ او تھانہ ماڈل ٹاﺅن نے موقع پر پہنچ کر کسان اتحاد کے نمائندوں اور واپڈا افسران سے مذاکرات کروائے جسکے بعد ایکسیئن میپکو فیاض حسین کھوکھر نے دھرنے کے شرکاء کو تمام جائز مطالبات منظور کرنے اور منقطع میٹر کنکشن بحال کرنے کی بھی یقین دہانی کروائی جسکے بعد مظاہرین پر امن طور پر منتشر ہو گئے اس موقع پر ایکسیئن میپکو فیاض حسین کھوکھر کا کہنا تھا کہ واپڈا نے جو بھی میٹر کنکشن بند کئے ہیں وہ عدم ادائیگی بل کی وجہ سے کئے ہیں کسان اتحاد کے ممبران کے ذمہ ایک کروڑ سے زائد کے کرنٹ بل واجب الادا ہیں جس سے میپکو مالی مشکلات کا شکار ہے جو کسان اپنے بل باقاعدگی سے ادا کرتے ہیں انکے کنکشن کسی صورت بھی منقطع نہیں کئے جاتے کسانوں کو اپنے ذمہ واجبات ہر صورت ادا کرنا ہونگے۔
About Author
