رشوت خور پولیس اہلکاروں کے خلاف ڈی پی او وہاڑی نے ڈنڈا اٹھا لیا،چار ایس ایچ اوز معطل

بورے والا(چوہدری اصغر علی جاوید سے)رشوت خور پولیس اہلکاروں کے خلاف ڈی پی او وہاڑی نے ڈنڈا اٹھا لیا،چار ایس ایچ اوز،دو سب انسپکٹر اور دو اے ایس آئی معطل،انکوائری شروع،تفصیلات کے مطابق آئی جی پنجاب کی ہدایت پر تھانوں سے رشوت کے خاتمہ کیلئے ڈی پی او وہاڑی نے عوامی شکایات کی روشنی میں کاروائی کا آغاز کر دیا جسکے تحت انہوں نے گزشتہ روز سرکل بورے والا کے چار تھانوں کے ایس ایچ اوز،دو سب انسپکٹر اور دو اے ایس آئی کو معطل کر کے انکے خلاف انکوائری کمیٹی بھی بنا دی معطل کئے گئے ایس ایچ اوز میں ایس ایچ او تھانہ صدر نادر خاں بلوچ،ایس ایچ او ساہوکا عبدالحئی،ایس ایچ او تھانہ فتح شاہ حق نواز اور ایس ایچ او تھانہ گگومنڈی چوہدری عبدالستار شامل ہیں جبکہ ایس ایچ او تھانہ شیخ فاضل چوہدری محمد طفیل کو شوکاز نوٹس جاری کر دیا ہے اسکے علاوہ تھانہ ساہوکا کے سب انسپکٹر رنگ الٰہی اور سب انسپکٹر ملک محمد جاوید،تھانہ صدر کے اے ایس آئی محمد حفیظ اور تھانہ سٹی کے اے ایس آئی محمد ارشد کو بھی رشوت کی شکایات پر معطل کر دیا ہے ڈی پی او وہاڑی نے تمام معطل کئے گئے پولیس اہلکاروں کے خلاف انکوائری کیلئے کمیٹی بھی بنا دی ہے جس میں رشوت ثابت ہونے پر ان تھانیداروں کے خلاف سخت محکمانہ کاروائی کا بھی فیصلہ کیا ہے۔