محکمہ ریلوے سے ویجیلنس ٹیمیں ختم ہونے سے کرپشن انتہا کو پہنچ گئی،اصلاح احوال کا مطالبہ
بورے والا(چوہدری اصغر علی جاوید سے)محکمہ ریلوے سے ویجیلنس ٹیمیں ختم ہونے سے کرپشن انتہا کو پہنچ گئی،ٹرینوں میں سہولیات اور بغیر ٹکٹ سفر کرنے والوں کی مانیٹرنگ نہ ہونے کے برابر،ایس ٹی ایز اور کنڈکٹر گارڈز کی موجیں،بغیر ٹکٹ سفر کرنے والوں میں غیر معمولی اضافہ،ٹرینوں کی تاخیر اور لائیو ٹریکنگ سسٹم بند ہونے سے مسافر خوار ہونے لگے،اصلاح احوال کا مطالبہ،تفصیلات کے مطابق سابقہ دور میں ٹرینوں میں بغیر ٹکٹ سفر کرنے والوں اور مسافروں کو دی جانے والی سہولتوں کی مانیٹرنگ کیلئے ملک بھر میں موبائل ویجیلنس ٹیمیں کام کر رہی تھیں جن کو موجودہ وفاقی وزیر ریلوے شیخ رشید احمد نے ختم کر کے بغیر ٹکٹ سفر کرنیوالوں اور مطلوبہ سہولیات فراہم نہ کرنے والوں کو کھلی چھٹی دیدی ہے اب ویجیلنس ٹیمیں نہ ہونے سے ٹرینوں میں بغیر ٹکٹ سفر کرنیوالے افراد سپیشل ٹرین ایگزامینرز اور کنڈکٹر گارڈ سے مبینہ ملی بھگت کر کے ٹکٹ لینے کی بجائے ان سے معمولات طے کر کے ریلوے کو روزانہ لاکھوں روپے کا مالی نقصان پہنچانے کا سبب بن رہے ہیں جبکہ ٹرینوں میں دی جانیوالی سہولیات نہ ہونے کے برابر رہ گئی ہیں اور بیشتر ٹرینیں 4 سے چھ گھنٹے تاخیر کا شکار ہو چکی ہیں ٹرینوں کا لائیو ٹریکنگ سسٹم بھی مفلوج ہو چکا ہے اس صورتحال میں روزانہ لاکھوں مسافروں کو شدید پریشانی کا سامنا کرنا پڑ رہا ہے مسافروں نے وفاقی وزیر ریلوے سے فوری اصلاح احوال کا مطالبہ کیا ہے۔
About Author
