اسسٹنٹ کمشنر اور اے ایس پی کی کاروائی،جعلی مینگو جوس بنانے والی فیکٹری پکڑ لی

بورے والا(چوہدری اصغر علی جاوید سے)اسسٹنٹ کمشنر،اے ایس پی اور تحصیلدار کی پولیس کے ہمراہ مشترکہ کاروائی،الفضل ٹاﺅن میں غیر رجسٹرڈ برانڈ کے نام سے وسیع پیمانے پر جعلی مینگو جوس تیار کرنے والی فیکٹری سے ہزاروں لیٹر جعلی جوس کی بوتلیں برآمد،موقع سے فیکٹری مالک کے بھائی سمیت دو افراد گرفتار،فیکٹری میں تیار کردہ جعلی جوس مختلف شہروں کو سپلائی کیا جاتا تھا،تفصیلات کے مطابق اسسٹنٹ کمشنر بورے والا حسنین خالد سنپال کو اطلاع ملی کہ نواحی آبادی الفضل ٹاﺅن میں محمد نعیم نامی شخص نے ایک مکان میں غیر رجسٹرڈ برانڈ کے نام سے بڑے پیمانے پر جعلی مینگو جوس تیار کرنے کی فیکٹری بنا رکھی ہے اور یہ جعلی جوس تیار کر کے مختلف شہروں کو سپلائی کا دھندہ جاری ہے اس اطلاع پر اسسٹنٹ کمشنر حسنین خالد سنپال نے اے ایس پی آصف رضا،تحصیلدار ظفر علی مغل،کانونگو فخرالدین،پٹواری طاہر نذیر بھٹی،حاجی شوکت علی اور پولیس کے ہمراہ اچانک چھاپہ مار کر فیکٹری کے مالک محمد نعیم کے بھائی وحید احمد اور ملازم عمر فاروق کو رنگے ہاتھوں گرفتار کر کے فیکٹری میں موجود تیار شدہ ہزاروں لیٹر جعلی مینگو جوس کی بوتلیں،سیلیں لگانے والی مشینیں،مکسچر مشین،سٹکر،کیمیکل اور دیگر سامان برآمد کر لیا جبکہ فیکٹری مالک موقع سے فرار ہو گیا اسسٹنٹ کمشنر حسنین خالد سنپال نے بتایا کہ فیکٹری میں تیار کیا جانے والا جعلی مضر صحت جوس مارکیٹ میں سپلائی ہوتا تھا جو انسانی جانوں کے لئے انتہائی خطرناک ہے انسانی جانوں سے کھیلنے والے ایسے عناصر کے خلاف سخت کاروائی عمل میں لائی جائے گی اور اس سلسلہ میں محکمہ صحت کے حکام اس جعلی جوس کے نمونے تجزیاتی لیبارٹری کو بھی روانہ کئے جائیں گے۔