حکومت نے ضلع وہاڑی میں تین ایڈیشنل اراضی ریکارڈ سنٹرز کے قیام کی منظوری دیدی
بورے والا(چوہدری صغر علی جاوید سے)اسسٹنٹ کمشنر حسنین خالد سنپال نے کہا ہے کہ حکومت پنجاب نے بورے والا سمیت ضلع وہاڑی کے تین دیہی مقامات پر عوام کی سہولت کیلئے ایڈیشنل اراضی ریکارڈ سنٹرز کے قیام کی منظوری دیدی جس پر جلد ہی کام کا آغاز کیا جا رہا ہے،ان خیالات کا اظہار انہوں نے میڈیا کے نمائندوں سے گفتگو کرتے ہوئے کیا اس موقع پر اسسٹنٹ ڈائریکٹر لینڈ ریکارڈ چوہدری عاصم رفیق اور انچارج سنٹر جی ایم ڈوگر بھی موجود تھے انہوں نے کہا کہ گذشتہ روز ڈپٹی کمشنر وہاڑی عرفان علی کاٹھیا کی زیر صدارت ہونے والے ضلعی عملدرآمد کمیٹی کے اجلاس میں ضلع وہاڑی کے تین دیہی مقامات ساہوکا(بورے والا)،پکھی موڑ(وہاڑی) اور میلسی میں (ٹبہ سلطان پور) کے مقامات پر ایڈیشنل اراضی ریکارڈ سنٹرز کے قیام کیلئے سفارشات تیار کر کے حکومت پنجاب کو منظوری کے لیے ارسال کی گئی تھیں ان ایڈیشنل ریکارڈ سنٹرز کی عمارات دس ماہ کی محدود مدت میں تعمیر کر کے وہاں عملہ تعینات کیا جائے گا انہوں نے بتایا کہ لینڈ ریکارڈز سنٹرز بورے والا میں تحصیل بھر کے ریونیو ریکارڈ نقول اراضی اور انتقالات اراضی کے سلسلہ میں کام کا جو بوجھ تھا اس میں کمی واقع ہو گی اور عوام الناس کو بہتر سہولیات میسر آئیں گی مہر حسنین خالد سنپال نے مزید بتایا کہ ڈپٹی کمشنر وہاڑی عرفان علی کاٹھیا کے احکامات کے تحت بورے والا اراضی ریکارڈ سنٹر پر بھی عملہ کی کمی دور کر دی گئی ہے جہاں تین اضافی ایس سی او تعینات کر دئیے گئے ہیں جنہوں نے اپنی ڈیوٹیاں سنبھال لی ہیں اور روزانہ ٹوکن اجراء کی تعداد 125 سے بڑھ کر 230 کر دی گئی ہے تا کہ زیادہ سے زیادہ سائلین کو روزانہ سہولت سے استفادہ حاصل ہو سکے عوامی سماجی،شہری اور کاشتکار حلقوں کی طرف سے تین نئے ایڈیشنل اراضی ریکارڈ سنٹرز کے قیام کے فیصلے کو ضلعی انتظامیہ اور حکومت پنجاب کا مستحسن اقدام قرار دیا گیا ہے۔
About Author
