بھتہ خور گروپ نے منصوبے کے تحت فائرنگ کر کے حالات کو خراب کرنے کی کوشش کی ہے۔قربان چوہان

بورے والا(چوہدری اصغر علی جاوید سے)پاکستان تحریک انصاف کے راہنما و چیئرمین چوہان لگثرری فلائنگ کوچ بورے والا چوہدری قربان علی چوہان نے کہا ہے کہ گذشتہ روز بھتہ خور گروپ نے ایک منظم سازش اور طے شدہ منصوبے کے تحت ہمارے منظور شدہ سٹینڈ کی حدود میں اندھا دھند فائرنگ کر کے حالات کو خراب کرنے کی کوشش کی ہے ہم اس سانحہ میں جاں بحق ہونے والے بے گناہ شہریوں اور زخمیوں کے ورثاء سے اظہار تعزیت کرتے ہوئے انتظامیہ سے مطالبہ کرتے ہیں کہ حقائق پر تفتیش کر کے ذمہ داروں کو قرار واقعی سزا دی جائے،ان خیالات کا اظہار انہوں نے اپنے دفتر میں اپنے صاحبزادے پی ٹی آئی کے سابق ٹکٹ ہولڈر قومی اسمبلی چوہدری خالد محمود چوہان اور سابق نائب تحصیل ناظم بورے والا رانا محمد مظفر خان کے ہمراہ پر ہجوم ہنگامی پریس کانفرنس سے خطاب کرتے ہوئے کیا اس موقع پر پی ٹی آئی کے اپوزیشن لیڈر بلدیہ غلام مصطفےٰ بھٹی،کونسلرز بلدیہ سردار راشد عظیم،شیخ عمران اسلم،محمد شہزاد بٹ،چیئرمین یونین کونسلز ملک اظہر حیات لنگڑیال،سجاد ظہور کاہلوں اور چوہدری ساجد حسین گجر بھی موجود تھے چوہدری قربان علی چوہان نے کہا کہ دو روز قبل نام نہاد ٹرانسپورٹرز بھتہ مافیا نے دن 11بجے سے ہی ہمارے سٹینڈ پر غنڈہ گردی کا آغاز کر دیا تھا جس کی اطلاع ہم نے اس وقت اے ایس پی بورے والا،ایس ایچ او سٹی اور 15پر دیدی تھی مگر انہوں نے اسکا خاطر خواہ سّدباب کرنے کی بجائے نہ معلوم صورتحال کی سنگینی کا کیوں احساس نہ کیا بلکہ دونوں طرف سے ایک ایک آدمی کو پکڑ کر حوالات میں بند کر دیا اسی روز دو بجے دن ہمیں اطلاع ملی کہ ایک بس میں مسلح مشکوک افراد اڈا کے قریب گھوم رہے ہیں جس کی اطلاع ہم نے فوری طور پر اسسٹنٹ کمشنر بورے والا کو دی جنہوں نے نفری بھیجنے کی یقین دہانی کروائی مگر 5منٹ بعد ہی گاڑی میں سوار مسلح حملہ آوروں نے اندھا دھند فائرنگ شروع کر دی جس سے بس سٹینڈ پر بھگدڑ مچ گئی اور ہمارے چوہان سٹینڈ کی سائیڈ پر کھڑے اور گزرنے والے مرد و خواتین راہگیر زخمی ہو کر گر پڑے جن میں تین افراد جاں بحق اور سات کے قریب زخمی ہوئے عظیم جانی نقصان کے بعد پولیس تاخیر سے پہنچی اور ہماری درخواست پر اندراج مقدمہ کی بجائے پولیس نے اپنی مدعیت میں قتل،اقدام قتل اور دہشت گردی کی دفعات کے تحت مقدمہ درج کر کے ہمارے لوگوں کو بھی اس میں نامزد کر دیا ہمیں اس پر بھی اعتراض نہیں ہے تا ہم ہمارا پولیس انتظامیہ سے مطالبہ ہے کہ وہ ہمارے کردار اور حملہ آوروں کے کردار کو پیش نظر رکھتے ہوئے مقدمہ کی غیر جانبدارانہ تفتیش کے بعد جاں بحق ہونے والوں کے ورثاء اور ہمیں انصاف مہیا کریں انہوں نے مزید کہا کہ جب سے ہم نے 14سالہ قانونی جنگ کے بعد اڈہ منظور کروا کر یہاں سے بورے والا کے عوام کو فیصل موور کی شکل میں سستی اور آرام دہ سفری سہولت فراہم کی ہے ہمارے اڈہ اور سٹینڈ پر فائرنگ اور حملے کا یہ تیسرا واقعہ ہے قبل ازیں 14روز قبل بھی ہماری مدعیت میں انہی ملزمان کے خلاف مقدمہ درج کیا گیا تھا نہ تو اس کے ملزمان اب تک پولیس نے گرفتار کئے اور نہ ہی کوئی موثرکاروائی کی جس کا رزلٹ تین قیمتی انسانی جانوں کے ضیاع کی صورت میں رونما ہوا پریس کانفرنس سے خطاب کرتے ہوئے تحریک انصاف کے راہنما سابق ایم پی اے چوہدری خالد محمود چوہان نے کہا کہ وہ اڈہ کی منظور ی کے بعد خود چل کر اپنے مخالفین کے گھر گئے تھے اور ان کے تحفظات دور کرنے کی یقین دہانی کروائی تھی اس کے بر عکس راتوں رات ایک خود ساختہ ٹرانسپورٹرز اتحاد وجود میں آیا جنہوں نے ہمارے قانونی اڈے کو بند کروانے کے لیے مختلف ہتھکنڈے شروع کر دیئے اور پھر ناکامی کے بعد حملہ آوروں کے ذریعہ فائرنگ کروا کر شہر کے حالات خراب کرنے کی مذموم کوشش کی ہے انہوں نے مزید کہا کہ وہ حلفاً کہتے ہیں ہماری بس اڈے پر گڑ بڑ کروانے کی کوئی پلاننگ نہ کی تھی اس کے باوجود پولیس تھانہ سٹی نے گذشتہ شب میرے گھر کی دیواریں پھاند کر مین گیٹ کی توڑ پھوڑ کر کے مجھے پکڑ کر تھانے کی حوالات میں بند کر دیا میں دس سال تک امریکہ میں رہا ہوں ایم پی اے رہا ہوں ایک کال پر بھی تھانے پہنچ جاتا پولیس کی اس کاروائی کے بعد مجھے اپنے سیاسی کارکن ہونے پر شرم اور ندامت محسوس ہو رہی ہے انہوں نے مطالبہ کیا کہ اڈے پر چلنے والے غیر قانونی بس سٹینڈ بند کئے جائیں فائرنگ کے واقعہ میں جاں بحق اور زخمی ہونے والوں کے ورثاء کو انصاف مہیا کیا جائے اور حکومت ہمیں کاروباری تحفظ فراہم کرے۔