اراضی ریکارڈ سینٹر کرپشن اور ٹاﺅٹ مافیا کا گڑھ بن گیا،سائلین خوار ہونے پر مجبور

بورے والا(چوہدری اصغر علی جاوید سے)اراضی ریکارڈ سینٹر کرپشن اور ٹاﺅٹ مافیا کا گڑھ بن گیا،دور دراز دیہات سے آنے والے سینکڑوں سائلین خوار ہونے پر مجبور،ٹاﺅٹ مافیا عملہ کی مبینہ ملی بھگت سے سادہ لوح افراد کی جیبیں خالی کرنے میں مصروف،عملہ کی کمی بھی عذاب بن کر رہ گئی،تفصیلات کے مطابق عوام کی سہولت کے لیے بنایا گیا اراضی ریکارڈ سنٹر سائلین کے لیے سر درد بن گیا عملہ کی کمی کا بہانہ بنا کر دفتر میں موجود عملہ ٹاﺅٹ مافیا کی مبینہ ملی بھگت سے رجسٹریوں،انتقال،نام درستگی،فرد ملکیت جاری کرنے اور دیگر کاموں میں بلاجواز اعتراضات میں الجھا کر سادہ لوح افراد کو کھلم کھلا لوٹنے میں مصروف ہے دفتر کے اندر اور باہر موجود ٹاﺅٹ رشوت لیکر دفتری کام کرواتے ہیں اور رشوت نہ دینے والے سارا دن قطاروں میں کھڑے ہو کر باری کے انتظار میں وقت ختم ہونے پر مایوس گھروں کو واپس لوٹ جاتے ہیں دفتر کے انچارج اے ڈی ایل آر کے پاس دو شہروں کا چارج ہونے کی وجہ سے وہ ہفتہ میں صرف تین روز بیٹھتے ہیں جس سے روزانہ سینکڑوں افراد ذلیل و خوار ہونے پر مجبور ہیں اس صورتحال میں محمد ادریس،سردار محمد،محمد شریف،محمد الیاس،نظام دین اور دیگر سائلین نے کمشنر ملتان اور ڈی سی وہاڑی سے فوری نوٹس لینے کا مطالبہ کیا ہے۔