بار ایسوسی ایشن کے سالانہ انتخابات،صدارت اور جنرل سیکرٹری کے امیدوار آمنے سامنے

بورے والا(چوہدری اصغر علی جاوید سے)بار ایسوسی ایشن بورے والا کے سالانہ انتخابات،امیدواروں کی انتخابی مہم زوروں پر،جوڑ توڑ کا سلسلہ جاری،ینگ لائرز فورم نے صدارت کے امیدوار ملک فرقان یوسف کی حمایت کا اعلان کر دیا،مدمقابل امیدوار شہزاد ڈوگر بھی متعدد دھڑوں کی حمایت حاصل کرنے میں کامیاب،تفصیلات کے مطابق بار ایسوسی ایشن بورے والا کے سالانہ انتخابات کی سرگرمیاں آخری مراحل میں داخل ہو گئیں صدارت کے لیے ملک فرقان یوسف اور سردار شہزاد ڈوگر میں ون ٹو ون جبکہ جنرل سیکرٹری کے عہدہ پر بھی چوہدری خرم ریاض اور کاشف مقبول جٹھول بھی آمنے سامنے ہیں صدارت کے دونوں امیدوار پہلے بھی بار کی صدارت کے الیکشن میں حصہ لے چکے ہیں لیکن کامیاب نہ ہو سکے اس بار دونوں ہی امیدوار اپنی کامیابی کے لیے ایڑھی چوٹی کا زور لگا رہے ہیں گذشتہ روز بار کے نوجوان وکلاء کے ایک مضبوط دھڑے ینگ لائرز فورم کے راہنماﺅں مہر افتخار احمد،سمیع اللہ جان،شفیق الزمان گھمن اور دیگر راہنماﺅں نے متفقہ طور پر ملک فرقان یوسف کی حمایت کا اعلان کر دیا دوسری جانب سردار شہزاد ڈوگر کی بھی بار کے سینئر اور موثر دھڑوں نے اپنی حمایت کا یقین دلا دیا ہے جن میں ساجد فرید ڈوگر،چوہدری محمد علی،چوہدری منظور احمد لالی،میاں افتخار احمد صابر،سردار ظہور احمد ڈوگر،مبین احمد بھٹی،رانا عبدالرحیم سمیت دیگر کئی سینئر نوجوان وکلاء نے انکی بھرپور حمایت کا اعلان کر دیا ہے جنرل سیکرٹری کے عہدہ پر چوہدری خرم ریاض اور کاشف مقبول جٹھول بھی اپنی کامیابی کے لیے جوڑ توڑ میں مصروف ہیں چوہدری خرم ریاض سابقہ الیکشن میں بھی امیدوار تھے لیکن وہ کامیاب نہ ہو سکے تھے انکی کامیابی کے لیے آرائیں،راجپوت،جٹ،گجر،ملک،ڈوگر اور دیگر برادریوں کے وکلاء نے انہیں حمایت کا یقین دلا دیا ہے جبکہ کاشف مقبول جٹھول بھی اپنی کامیابی کے لیے پر امید نظر آ رہے ہیں نوجوان اور سینئر وکلاء کی ایک بڑی تعداد انکے کیمپ میں بھی نظر آ رہی ہے کامیابی کا تاج کس کے سر سجتا ہے یہ کہنا قبل از وقت ہے۔