بورے والا شہر میں بننے والی 31غیر قانونی ہاﺅسنگ کالونیوں کے خلاف نیب کا ایکشن

بورے والا(چوہدری اصغر علی جاوید سے)بورے والا شہر میں بننے والی 31غیر قانونی ہاﺅسنگ سکیموں( سب لینڈ ڈویژن) اور کالونیوں کے مالکان نے میونسپل کمیٹی اورمحکمہ مال سے سازباز ہو کر شہریوں کو بنیادی سہولتوں کے سہانے خواب دکھا کر کروڑوں روپے مالیت کے پلاٹ فروخت کر دئیے،تحقیقات میں انکشاف،تفصیلات کے مطابق میونسپل کمیٹی کی حدود میں واقع 31غیر قانونی لینڈ سب ڈویژن اور کالونیاں بن چکی ہیں قانون کے مطابق لینڈ سب ڈویژن میں 100کنال سے کم رقبہ شامل ہوتا ہے مالکان نے 30فٹ کی گلی پارک کے لیے 7فیصد پبلک بلڈنگ جس میں سکول،مسجد،ڈسپنسری کے لیے 2سے 10فیصد اور کمرشل مارکیٹ کے لیے 5فیصد جگہ چھوڑنی ہوتی ہے اور اس رقبہ کو ایک معاہدہ کے تحت میونسپل کمیٹی کے نام منتقل کرنا ہوتا ہے مگر ان غیر قانونی لینڈ سب ڈویژن کے مالکان نے میونسپل کمیٹی اور محکمہ مال سے مبینہ ملی بھگت کر کے لینڈ سب ڈویژن کی فائلیں منظوری کے لیے جان بوجھ کر لٹکائی ہوئی ہیں چک نمبر 437ای بی میں واقع شیر خضر ہاﺅسنگ سکیم کے مالک سلطان محمود ولد محمود احمد نے کھیوٹ نمبر 88،81،79،76من،80،76من،82،77من،85،79من،86،80من،87،80من کھتونی نمبر216 سے 218،204،206،213،215خسرہ نمبر35،36،42میں ایک ڈویلپر کے ساتھ معاہدہ کر کے سب لینڈ ڈویڑن کالونی قائم کی اس کا کیس 2012 سے ڈسٹرکٹ اینڈ ڈی سی کمیٹی وہاڑی کے پاس ابھی تک فائلوں میں اٹکا ہوا ہے مالکان نے شہریوں کو بنیادی سہولتوں کے سہانے خواب دکھا کر اس لینڈ سب ڈویژن کے 80فیصد پلاٹ فروخت کر دیئے ہیں کئی ٹاﺅنز میں پلاٹوں کے خریدار واٹر سپلائی اور بجلی کے کنکشنوں کے حصول کے لیے متعلقہ دفاتر میں مارے مارے پھر رہے ہیں بتایا جاتا ہے کہ ڈویلپر جس کے ساتھ مالکان کا ایگریمنٹ تھا وہ دبئی فرار ہو چکا ہے تحقیقات میں نیب کے پاس ان غیر قانونی کالونیوں کی آڑ میں پلاٹوں کی خرید و فروخت کرنے والی مزید بڑے بڑے نام سامنے آ رہے ہیں۔