غیر قانونی ویگن اور بس اڈوں کے خلاف صوبے بھر میں جلد آپریشن کا آغاز کیا جائے گا۔جہانزیب کھچی

بورے والا(چوہدری اصغر علی جاوید سے)صوبائی وزیر ٹرانسپورٹ پنجاب جہانزیب خاں کھچی نے کہا ہے کہ مظفر گڑھ سکول وین میں سلنڈر سے آتشزدگی کا واقعہ انتہائی دلخراش ہے،ویگنوں اور بسوں میں گیس سلنڈر نصب کر کے انسانی جانوں سے کھیلنے والے اب کسی صورت برداشت نہیں ہونگے،غیر قانونی ویگن اور بس اڈوں کے خلاف صوبے بھر میں جلد آپریشن کا آغاز کیا جائے گا،غیر قانونی اڈے ازخود بند کر دیں ورنہ قانون حرکت میں آئے گا منظور شدہ ویگن اور بس اڈوں پر اوور لوڈنگ کا خاتمہ اور مسافروں کو ہر ممکن سہولتوں کی فراہمی یقینی بنائیں گے،ہائی ویز کے گرد تجاوزات سے حادثات میں اضافہ ہو رہا ہے ان تجاوزات کے مکمل خاتمہ کیلئے تمام شہروں میں گرینڈ آپریشن کیا جائے گا،موجودہ حکومت کی اولین ترجیح اداروں کو کرپشن سے پاک کر کے انکو مضبوط بنانا ہے،محکمہ ٹرانسپورٹ میں افسروں،دیگر عملہ اور ضروری سہولتوں کی کمی کو دور کرکے اسے فعال کیا جائے گا گزشتہ دس سال سے محکمہ ٹرانسپورٹ لاوارث رہا اور سابقہ حکومت کی تمام تر توجہ اورینج ٹرین پر مرکوز رہی جس سے ٹرانسپورٹ کا محکمہ مفلوج ہوکر رہ گیا،ان خیالات کا اظہار انہوں نے پی ٹی آئی جنوبی پنجاب کے نائب صدر چوہدری خالد محمود چوہان کی رہائش گاہ پر مختصر قیام کے دوران میڈیا سے گفتگو کرتے ہوئے کیا اس موقع پر سابق ایم این اے چوہدری قربان علی چوہان،سابق امیدوار صوبائی اسمبلی سردار خالد نثار ڈوگر،پی ٹی آئی سپورٹس اینڈ کلچرل فیڈریشن جنوبی پنجاب کے صدر چوہدری اعجاز اسلم،سٹی جنرل سیکرٹری سردار راشد عظیم،تحصیل صدر طارق محمود باجوہ،سنیئر نائب صدر چوہدری محمد شفیق گجر،سابق ناظم سردار عابد عظیم،حافظ راشد ستار،عبدالمجیب پوسوال،چوہدری رشید سومی گجر اور کونسلر بلدیہ شیخ عمران اسلم بھی موجود تھے دریں اثناء صوبائی وزیر جہانزیب کھچی نے سٹی صدر پی ٹی آئی ملک فاروق اعوان،جنرل سیکرٹری سٹی میلسی حیدر علی اور سیکرٹری ریجنل ٹرانسپورٹ اتھارٹی ایاز حسین کے ہمراہ جنرل بس سٹینڈ کے علاوہ دو نجی ڈی کلاس ویگن اڈوں کا اچانک معائنہ کیا پرائیویٹ ویگن سٹینڈ مالکان کو صفائی کی صورتحال بہتر بنانے،مسافروں کو تمام ضروری سہولتوں کی فراہمی،تجاوزات اور اوورلوڈنگ کے فوری خاتمہ کی ہدایت کی جبکہ جنرل بس سٹینڈ کے مسافر خانے میں منشیات کے عادی افراد کے قیام،سہولتوں کی عدم فراہمی اور میونسپل کمیٹی کے عملہ کی مبینہ سرپرستی میں اوور چارجنگ کی شکل میں ہونے والی کرپشن بارے شکایات پر سخت برہمی کا اظہار کرتے ہوئے اوورچارجنگ کے فوری آڈٹ کا حکم دیا اور تمام غیر قانونی اڈا مالکان کو وارننگ دی کہ وہ فوری طور پر انہیں بند کر دیں یا ضابطہ کے تحت منظوری لیں بصورت دیگر ایک آپریشن کے ذریعہ انہیں ختم کروا دیا جائے گا بعدازاں صوبائی وزیر سٹی صدر ملک فاروق اعوان کے ہمراہ اُنکے چیمبر پر گئے جہاں انہوں نے سابق صدر بار سردار ساجد فرید ڈوگر اور سردار شہزاد احمد ڈوگر سے بھی ملاقات کی۔