بیوہ خاتون کو گھر سے اغوا کے بعد کئی روز تک مبینہ اجتماعی زیادتی کا نشانہ بنانے والے ملزمان آزاد
بورے والا(چوہدری اصغر علی جاوید سے)بیوہ خاتون کو گھر سے اغوا کے بعد نامعلوم مقام پر لیجا کر کئی روز تک مبینہ اجتماعی زیادتی کا نشانہ بنانے والے ملزمان آزاد،بااثر ملزمان کئی روز تک نشہ پلا کر حیوانی کھیل کھیلتے رہے،اپنے خلاف اغوا کا مقدمہ درج ہونے کا پتہ چلنے پر خاتون کو نیم بیہوشی کی حالت میں پھینک کر فرار ہو گئے تھے،بااثر ملزمان کو پولیس تھانہ ساہوکا گرفتار کرنے کی بجائے متاثرہ خاندان کو انصاف کے لئے در بدر کی ٹھوکریں کھانے پر مجبور کردیا،زیادتی کا شکار متاثرہ خاتون نے عدالت کے روبرو بھی بیان ریکارڈ کروا دیا،تفصیلات کے مطابق نواحی گاﺅں 317ای بی دیوان صاحب کے رہائشی کے محنت کش ناصر حسین چاولیانہ نے میڈیا کو تفصیلات بیان کرتے ہوئے بتایا کہ28جولائی کو صبح اُسی گاﺅں کے بااثر زمیندار تجمل حسین نے اپنے دیگر ساتھیوں کے ہمراہ اسکی بہن مسماة روبینہ کو گھر سے زبردستی اغوا کیا اور گھر سے طلائی زیورات و نقدی سمیت لیکر فرار ہو گئے جنکے خلاف تھانہ ساہوکا میں اغوا کا مقدمہ درج کروا دیا جس کے کئی روز بعد اسکی بہن روبیہ کو نیم بیہوشی کی حالت میں ملزمان لودھراں کے قریب پھینک کر فرار ہو گئے پولیس کے ذریعہ اپنی مغوی بہن کی بازیابی کا پتہ چلا جسے پولیس نے اپنی تحویل میں لیکر ابتدائی طبی امداد کے بعد اسکے بیان کی روشنی میں اُسکا میڈیکل کروایا اور خون کے نمونے لیکر ڈی این اے کے لیے لاہور لیبارٹری روانہ کر دئیے اس موقع پر مغوی روبینہ نے پولیس کو بتایا کہ مذکورہ ملزمان تجمل حسین،زاہد،نبی بخش اور صادق اسے اغوا کرنے کے بعد ایک نامعلوم مقام پر لے گئے جہاں چاروں افراد اس نشہ آور دوائی پلا کر اجتماعی زیادتی کا نشانہ بناتے رہے کئی روز تک ملزمان اسکے ساتھ یہ حیوانی کھیل کھیلتے رہے اسی دوران جب انہیں پتہ چلا کہ انکے خلاف تھانہ ساہوکا میں اغوا کا مقدمہ درج ہو گیا ہے تو وہ اسے نشہ پلا کہ نیم بیہوش کی حالت میں تھانہ صدر لودھراں کے علاقہ میں پھینک کر فرار ہو گئے جبکہ روبینہ نے مقامی علاقہ مجسٹریٹ کی عدالت میں پیش کرنے پر بھی عدالت کے روبرو یہی بیان دیا جس کے بعد ملزمان جو کہ علاقہ میں دندناتے پھرتے ہیں اور تھانے میں بیٹھ کر ہمیں دھمکیاں دیتے ہیں کہ تمہارا کچھ نہیں بنے گا جہاں تک بھاگنا ہے بھاگ لو پولیس کے سامنے بیٹھ کر ملزمان کی دیدہ دلیری اور انہیں گرفتار نہ کرنے پر ہمیں انصاف کی کوئی امید نہیں اتنا ظلم اور زیادتی کرنے کے بعد بھی ہمارے ملزمان آزاد ہیں میری بیوہ بہن کی زندگی برباد کرنے والے بااثر ملزمان سے پولیس سازباز ہو چکی ہے اور انہیں گرفتار نہیں کر رہی ناصر حسین نے چیف جسٹس آف پاکستان،وزیر اعلیٰ پنجاب،آر پی او ملتان اور ڈی پی او وہاڑی سے مطالبہ کیا ہے کہ ڈیڑھ ماہ کر عرصہ گرز جانے اور مقدمہ درج ہونے کے باوجود پولیس ملزمان کو گرفتار نہیں کر رہی اس نے اپنی بہن کے لیے انصاف کے حصول کا مطالبہ کیا ہے۔
About Author
