جہاں پر کام زیادہ کرنا پڑے وہاں جذبہ اور حوصلہ مضبوط ہو جاتا ہے۔حافظ فدا حسین

بورے والا(چوہدری اصغر علی جاوید سے)تعلیمی بورڈ ساہیوال کے کنٹرولر امتحانات ڈاکٹر حافظ فدا حسین نے کہا ہے کہ جہاں پر کام زیادہ کرنا پڑے وہاں جذبہ اور حوصلہ مضبوط ہو جاتا ہے،ساہیوال تعلیمی بورڈ میں بہت زیادہ محنت درکار ہے لیکن آئندہ تین سالوں میں یہ بورڈ پنجاب کا نمبرون تعلیمی بورڈ بن جائے گا،ہمیں محنت اور جدوجہد کو تسلسل کے ساتھ جاری رکھنا چاہئے ذمہ داریوں کو ایمانداری سے ادا کرنے والوں کو معاشرے میں عزت ملتی ہے اور اللہ کے ہاں بھی انسان سرخرو ہوتا ہے،ان خیالات کا اظہار انہوں نے اپنے اعزاز میں تنظیم اساتذہ کے مرکزی راہنما پروفیسر جاوید اقبال کی طرف سے دئیے گئے استقبالیہ سے خطاب کرتے ہوئے کیا تقریب سے خطاب کرتے ہوئے ایم پی اے بورے والا سردار خالد محمود ڈوگر نے کہا کہ حافظ فدا حسین کی تعلیمی خدمات قابل رشک ہیں جن کی تقلید کر کے ہم اپنے اداروں کی بہتر خدمت کر سکتے ہیں قابل،محنتی اور باصلاحیت افراد ہمیشہ اداروں کی ترقی اور وقار میں اضافے کا باعث بنتے ہیں تقریب کے میزبان پروفیسر جاوید اقبال نے ڈاکٹر حافذ فدا حسین اور دیگر تمام شرکاء کا شکریہ ادا کیا ایم پی اے چوہدری یوسف کسیلیہ بھی تقریب میں موجود تھے جبکہ اس تقریب سے تنظیم اساتذہ پاکستان کے مرکزی صدر پروفیسر تنویر حسین شاہ،پرنسپل گورنمنٹ کالج وہاڑی پروفیسر رانا محمد یعقوب،پرنسپل گورنمنٹ کالج بورے والا پروفیسر محمد اشرف چوہدری،پرنسپل پنجاب کالج پروفیسر مجید اکبر،پروفیسر کرامت شکیل اور دیگر نے بھی خطاب کیا اس موقع پر پولیس چیف کوآرڈینٹر سہیل صابر چوہدری،سماجی شخصیت شیخ شہزاد مبین،پروفیسر مشتاق احمد اور دیگر ماہرین تعلیم بھی موجود تھے۔