فروٹ،سبزی اور گوشت کے من مانے ریٹوں سے منافع خوروں نے شہریوں کی کھال اُتار دی

بورے والا(چوہدری اصغر علی جاوید سے)شہر میں ناجائز منافع خوری کے تمام سابقہ ریکارڈ ٹوٹ گئے،فروٹ،سبزی اور گوشت کے من مانے ریٹوں سے منافع خوروں نے شہریوں کی کھال اُتار دی،مارکیٹ کمیٹی اور تحصیل و ضلعی انتظامیہ ابھی تک الیکشن مصروفیت سے فارغ نہ ہو سکی،منافع خور شتر بے مہار ہو گئے،تفصیلات کے مطابق بورے والا شہر اور اسکے گردونواح میں سبزی،فروٹ اور گوشت کی قیمتوں کو پر لگ گئے مارکیٹ کمیٹی کے جاری کردہ نرخنانوں کی پرواہ کیے بغیر قصابوں نے گراں فروشی اور من مانے ریٹوں سے شہریوں کی کھال اتارنا شروع کر دی جبکہ سبزی اور فروٹ فروشوں نے بھی درجہ دوم کی چیزیں درجہ اول کی قیمتوں میں فروخت کرتے ہوئے شہریوں کا معاشی استحصال اور لوٹ مار کے تمام سابقہ ریکارڈ توڑ ڈالے ہیں مارکیٹ کمیٹی کے عملہ،تحصیل اور ضلعی انتظامیہ نے شہریوں کو ان ناجائز منافع خوروں کے رحم و کرم پر چھوڑ دیا ہے اور خود الیکشن میں مصروفیت کا بہانہ بنا کر ائیر کنڈیشنڈ کمروں میں ٹھنڈی ہواﺅں کے مزے لے رہے ہیں شہر میں قانون نام کی کوئی چیز نظر نہیں آتی شہری اس لاقانونیت کے سامنے بے بس ہو چکے ہیں اس افسوس ناک صورتحال میں سول سوسائٹی کے نمائندوں سید سجاد حسین بخاری،میاں عدیل مختار،چوہدری محمد عامر،میاں محمد اشرف،عبدالرﺅف چوہدری،محمد شیر خاں کھچی اور دیگر نمائندہ شہریوں نے ڈی سی وہاڑی سے فوری نوٹس لینے کا مطالبہ کیا ہے۔