وفاداریاں تبدیل کرنے والے سیاسی خانہ بدوشوں کو عوام نے مسترد کر دیا ہے۔خالد چوہان،خالد نثار

بورے والا(چوہدری اصغر علی جاوید سے)حلقہ این اے162 سے پی ٹی آئی کے امیدوار چوہدری خالد محمود چوہان نے کہا ہے کہ وفاداریاں تبدیل کرنے والے سیاسی خانہ بدوشوں کو عوام نے مسترد کر دیا ہے،بورے والا میں بدتہذیبی اور بدکلامی کی سیاست کا منہ توڑ جواب دیا جائے گا،پی ٹی آئی کے ٹائیگرز کا سونامی 25جولائی کو برساتی مینڈکوں کو بہا کر لے جائے گا،عدالت سے تاحیات نااہل ہونے کے بعد اپنے خاندان کو برادری ازم کی بنیاد پر مسلط کرنے والوں کی سیاست کا باب انشاءاللہ ہمیشہ کے لیے بند کر دیں گے اگر پارٹی قائدین کے خلاف غلیظ زبان بند نہ کی تو ہم خاموش نہیں رہیں گے،مخالفین یہ جان لیں کہ یہ 2018ء کا الیکشن ہے اور آج کی نوجوان نسل نے عمران خان کو اپنا لیڈر تسلیم کر لیا ہے جسے وہ آئندہ وزیر اعظم دیکھا چاہتے ہیں جن لوگوں نے پارٹی کی کاخاطر قربانی دی اور پارٹی کے فیصلے کو تسلیم کیا ہے وہ ہمارے ماتھے کو جھومر ہیں،انشاءاللہ پارٹی اقتدار میں آکر ان جانثاروں کی قربانیوں کا قرض اتارے گی،ان خیالات کا اظہار انہوں نے اپنے حلقہ میں انتخابی مہم کے دوران مختلف دیہات میں کارنر میٹنگز سے خطاب کرتے ہوئے کیا اس موقع پر پی ٹی آئی کے امیدوار صوبائی اسمبلی خالد نثار ڈوگر نے کہا کہ پارٹی نے جس طرح ہم پر اعتماد کیا ہے ہم بھی پارٹی کے وقار اسکی کامیابی اور کارکنوں کے دفاع کے لیے کوئی کسر اٹھا نہیں رکھیں گے ہم شرافت کی سیاست پر یقین رکھتے ہیں اگر کسی نے دھونس دھاندلی یا ہمار ے کارکنان کو خوفزدہ کرنے کی کوئی مذموم کوشش کی تو انکا پوری قوت سے جواب دیں گے نوجوانوں کا جوش و خروش یہ ثابت کر رہا ہے کہ 25جولائی پی ٹی آئی کی فتح کا دن ہو گا۔