پارٹی ڈسپلن کی خلاف ورزی کرنے والوں کے خلاف صدر جنوبی پنجاب اسحاق خاکوانی ڈٹ گئے

بورے والا(چوہدری اصغر علی جاوید سے)پی ٹی آئی کے ٹکٹوں کے حصول کی جنگ آخری مرحلے میں داخل،کارکنان تذبذب کا شکار،سوشل میڈیا کی افواہوں سے پی ٹی آئی کارکنان کے علاوہ عام شہری بھی چکرا گئے،پارٹی آئندہ 24گھنٹوں میں حتمی امیدواروں کا اعلان کر دیگی،پارٹی ذرائع،پارٹی ڈسپلن کی خلاف ورزی کرنے والوں کے خلاف اسحاق خاکوانی ڈٹ گئے،تفصیلات کے مطابق بورے والا میں قومی اسمبلی کی ایک اور صوبائی اسمبلی کی دو نشستوں سمیت ضلع بھر میں پی ٹی آئی کے حتمی امیدواروں کے اعلان کی تاخیر سے شہر کے سیاسی حلقوں،پی ٹی آئی کے کارکنان اور عام شہریوں میں تبصروں اور قیاس آرائیوں نے زور پکڑ لیا ہے سوشل میڈیا پر اپنے فیورٹ امیدوار کو پارٹی ٹکٹ ملنے کی جھوٹی افواہیں پھیلانے والوں نے سیاسی حلقوں کو چکرا کے رکھ دیا ہے پی ٹی آئی کی طرف سے این اے162 کیلئے تین امیدواروں چوہدری خالد محمود چوہان،عائشہ نذیر جٹ اور خالد نثار ڈوگر نے درخواستیں دے رکھی ہیں اور تمام امیدواران ہی پر امید نظر آ رہے ہیں لیکن پارٹی ذرائع کے مطابق صدر جنوبی پنجاب اسحاق خاں خاکوانی نے پارلیمانی بورڈ کو دی گئی سفارشات میں ضلعی صدر چوہدری خالد محمود چوہان کو فیورٹ قرار دیا ہے جبکہ عائشہ نذیر جٹ اور خالد نثار ڈوگر کے خلاف پارٹی ڈسپلن کی خلاف ورزی جیسے تحفظات کا اظہار کیا ہے پی پی230 کیلئے غلام مصطفےٰ بھٹی،حاجی شہباز ڈوگر،امجد حمید چوہان،ملک فاروق احمد اعوان،خالد نثار ڈوگر اور ملک ناصر اعوان کے نام قابل ذکر ہیں ان میں سے کسی بھی امیدوار کے ٹکٹ کا فیصلہ آنے سے قبل تمام امیدوار خود کو ہاٹ فیورٹ قرار دے رہے ہیں جبکہ پی پی229 میں میاں نعیم اعجاز،ملک افتخار اعوان،سرفراز اقبال گھمن،عائشہ نذیر جٹ،چوہدری ساجد شریف اور سلمان یوسف گھمن نے ٹکٹ کے حصول کی درخواستیں دی ہیں ان میں عائشہ نذیر جٹ اور میاں نعیم اعجاز کو پارٹی ذرائع فیورٹ قرار دے رہے ہیں تاہم آئندہ 24گھنٹوں میں حتمی امیدوراوں کا اعلان متوقع ہے۔