ٹی ایچ کیو ہسپتال کا سیکورٹی عملہ شہریوں کیلئے عذاب بن گیا،شہریوں کا احتجاج

بورے والا(چوہدری اصغر علی جاوید سے)تحصیل ہیڈ کوارٹر ہسپتال بورے والا کا سیکورٹی عملہ شہریوں کیلئے عذاب بن گیا،ہسپتال آنے والوں سے بدسلوکی اور غنڈہ گردی معمول بنا لیا،گیٹ اور وارڈوں میں تعینات عملہ کی فرعونیت حد سے گزر گئی،ایم ایس اور دیگر انتظامیہ بھی سیکورٹی عملہ کی چیرہ دستیوں کے سامنے بے بس ہو گئی،سنٹرل کنٹریکٹ کی وجہ سے سیکورٹی عملہ بے لگام گھورا بن گیا،شہریوں اور سماجی تنظیموں کا احتجاج،تفصیلات کے مطابق تحصیل ہیڈ کوارٹر ہسپتال بورے والا میں صوبائی سنٹرل کنٹریکٹ کے تحت تعینات سیکورٹی عملہ کی فوج ظفر موج شہریوں کے عذاب بن چکی ہے سیکورٹی کا عملہ نہ صرف گیٹ پر پارکنگ کے جگا ٹیکس کی وصولی پر ہسپتال آنے والے مریضوں اور اُنکے لواحقین کے لیے فرعون بن چکا ہے بلکہ وارڈز میں تعینات یہ باوردی گلو بٹ مریضوں اور اُنکے ساتھ آنے والوں سے مبینہ طور پر غنڈہ گردی کرتے نظر آتے ہیں روزانہ کی بنیاد پر شہریوں سے سیکورٹی عملہ کی جانب سے پیش آنے والے بد تمیزی اور بدتہذہبی کے ان واقعات کی شکایات میں اضافہ ہوتا جا رہا ہے جبکہ سنٹرل کنٹریکٹ ہونے کی وجہ سے ہسپتال انتظامیہ ان گلو بٹوں کے سامنے بے بس نظر آ رہی ہے اور آج تک شہریوں کی کسی بھی شکایت کا ازالہ نہیں کر سکی اس تشویشناک صورتحال میں سول سوسائٹی نیٹ ورک،وکلاء،تاجروں،سیاسی و مذہبی جماعتوں کے نمائندہ افراد نے سیکرٹری صحت پنجاب،کمشنر ملتان ڈویژن اور دیگر اعلیٰ حکام سے سیکورٹی عملہ کی ان زیادتیوں کا فوری نوٹس لینے کا مطالبہ کیا ہے۔