نواحی گاﺅں ایل-61/12 علاقہ غیر کا منظر پیش کرنے لگا،ہوائی فائرنگ سے پورا علاقہ لرز اُٹھا
بورے والا(چوہدری اصغر علی جاوید سے)تھانہ اوکانوالا کا نواحی گاﺅں ایل-61/12 علاقہ غیر کا منظر پیش کرنے لگا،25ایکڑ زرعی اراضی پر زبردستی قبضہ کیلئے 30سے زائد مسلح افراد کا دھاوا،اندھا دھند ہوائی فائرنگ سے پورا علاقہ لرز اُٹھا،مسلح افراد کا خواتین پر بہیمانہ تشدد،گاﺅں کے مرد و خواتین نے جرات مندی کا مظاہرہ کرتے ہوئے چند مسلح افراد سے بھاری مقدار میں جدید اسلحہ چھین کر بھاگنے پر مجبور کر دیا،مسلح افراد بھاری اسلحہ اور ساتھ لایا گیا محکمہ مال کا رجسٹر گرداوری چھوڑ کر بھاگ نکلے،پولیس کی چشم پوشی سے مسلح افراد نے زمین پر قبضہ کر لیا،وقفہ وقفہ سے فائرنگ جاری متاثرہ خاندان کا بااثر قبضہ گروپ کے خلاف احتجاجی مظاہرہ، تفصیلات کے مطابق تھانہ اوکانوالا کے نواحی گاﺅں ایل-61/12 کے رہائشی منظور احمد لنگڑیال، ملک شیر احمد،ملک نذر محمد اور ملک نور محمد نے”بورے والا اپڈیٹس نیوز“ کو بتایا کہ وہ اسی گاﺅں میں قیام پاکستان کے بعد ملنے والی 25ایکڑ گھوڑی پال اراضی کاشت کر رہے ہیں اور محکمہ مال کے ریکارڈ میں خسرہ گراوری بھی اُنکے نام ہے جبکہ نواحی قصبہ بصیرہ کے رہائشی بااثر زمیندار ملک سجاد لنگڑیال نے متعدد بار اس اراضی پر زبردستی قبضہ کی کوشش کی لیکن کامیاب نہ ہو سکا آج ملک سجاد لنگریال نے گاڑیوں پر سوار آتشیں اسلحہ سے لیس 30سے زائد افراد کے ہمراہ زمین پر قبضہ کرنے کیلئے دھاوا بول دیا اور آتے ہی اسلحہ برداروں نے جدید ہتھیاروں سے اندھا دھند ہوائی فائرنگ کرکے پورے علاقہ میں خوف و ہراس پھیلا دیا اور گندم کی کھڑی فصل میں گھس گئے شدید فائرنگ سے پورا گاﺅں لرز اُٹھا اسی دوران چند مسلح افراد نے ڈیرہ پر آکر خواتین اور بچوں کو بہیمانہ تشدد کا نشانہ بنانا شروع کیا تو اُنکے خاندان کے علاقہ قریبی گھروں کی خواتین اور مردوں نے جرات مندی کا مظاہرہ کرتے ہوئے گھیرا ڈال کر مسلح افراد کو دبوچ لیا جس پر اُنکے ساتھیوں نے اندھا دھند فائرنگ کر دی تو مسلح افراد بھاری مقدار میں تھیلوں میں بھری سینکڑوں گولیاں،جدید اسلحہ اور اپنے ساتھ لایا گیا محکمہ مال کا اصل رجسٹرڈ خسرہ گرداوری چھوڑ کر فرار ہو گئے اور دور کھڑے اپنے دیگر ساتھیوں کے پاس جا کر اُن کے ساتھ ملکر دوبارہ اندھا دھند فائرنگ کرتے ہوئے 25ایکڑ اراضی پر قبضہ کرکے اسلحہ برادروں کا پہرہ بٹھا دیا واقعہ کی اطلاع ملتے ہی تھانہ اوکانوالا پولیس کی بھاری نفری موقع پر پہنچ گئی لیکن اسلحہ برادروں کی جانب سے وقفہ وقفہ سے فائرنگ کا سلسلہ جاری ہے اس واقعہ کے خلاف ملک منظور احمد کی قیادت میں خواتین اور دیگر اہل علاقہ نے احتجاجی مظاہرہ کیا انہوں نے بتایا کہ ہم عرصہ 40سال سے اس زمین کو کاشت کر رہے ہیں جس کے متعلق ملک سجاد وغیرہ نے محکمہ ریونیو میں درخواست دیدی تھی محکمہ ریونیو نے ہمارے خلاف فیصلہ دیا جسے ہم نے ہائیکورٹ میں چیلنج کر رکھا ہے کیس کا تاحال کوئی فیصلہ نہیں ہوا اور ملک سجاد وغیر نے آج دھاوا بول کر زبردستی زمین پر قبضہ کرنے کیلئے اپنے اسلحہ بردار وہاں بٹھائے ہیں جن سے ہمیں اپنی جان کا بھی خطرہ ہے انہوں نے آر پی او ساہیوال اور ڈی پی او سے فوری تحفظ فراہم کرنے اور علاقہ کو اسلحہ برادروں سے پاک کرنے کا مطالبہ کیا ہے اس سلسلہ میں ایس ایچ او تھانہ اوکانوالہ اعجاز اسلم نے بتایا کہ دونوں گروپوں میں زمین پر قبضے کا تنازعہ چل رہا ہے ملک سجاد لنگڑیال کو محکمہ ریونیو نے خود قبضہ دلوایا ہے اور وہ قبضہ پر بیٹھے تھے کہ ملک منظور وغیرہ پارٹی جو کہ40 سال سے قابض تھی انہوں نے قبضہ پر بیٹھے افراد سے اسلحہ چھینا ہے کچھ اسلحہ ہم نے قبضہ میں لے لیا باقی اُنکے پاس ہے فریقین کو دستاویزی ثبوتوں کے ساتھ تھانے بلوایا ہے جس کا حق ہو گا اُسے دلوائیں گے کسی سے زیادتی نہیں ہو گی۔
About Author
