بہنوئی نے اپنے بھائی اور بیٹے کے ہمراہ سالے کو گھر سے اغواء کر کے قتل کر دیا

بورے والا(چوہدری اصغر علی جاوید سے)بہنوئی نے اپنے بھائی اور بیٹے کے ہمراہ سالے کو گھر سے اغواء کر کے قتل کر دیا،آئی جی پنجاب کے حکم پر کی گئی انکوائری رپورٹ کی روشنی میں تھانہ صدر پولیس نے 16ماہ بعد ملزمان کے خلاف مقدمہ درج کر لیا،تفصیلات کے مطابق چک 519ای بی بورے والا کے 85سالہ غریب بھٹہ مزدور محمد ارشد نے بتایا کہ 2اپریل 2016کی صبح اس کا داماد غلام باقر سکنہ 9-Rکچا کھوہ میرے 33سالہ بیٹے محمد عارف کو اس کی ہمشیرہ کے گھر کچا کھوہ لے گیا اور وہاں جا کر اپنے ساتھیوں کی مدد سے اسے قتل کر کے نعش غائب کر دی اور مجھے فون کیا کہ ہم نے عارف کو صفحہ ہستی سے مٹا دیا ہے اس کے قل کروا لو ابھی میں نے ان کے خلاف پولیس سے رجوع کیا تھا کہ ملزمان نے میرے اور میرے گھر والوں کے خلاف میری ہی 20سالہ نواسی سونیا کے اغوا کا مقدمہ تھانہ کچا کھوہ میں درج کروا کر ہمیں گرفتار کروادیا اور میں چھ ماہ تک جرم بے گناہی میں جیل میں پڑا رہا بالا آخر میں اس مقدمہ میں بے گناہ ہو کر گھر آیا اور اپنے بیٹے کے قتل کا مقدمہ درج کروانے کے لئے بورے والا ،وہاڑی ،ملتان اور لاہور میں اعلیٰ پولیس افسران کے دفاتر کے چکر کاٹتا رہا بالا آخر آئی جی پنجاب کے حکم پر کرائمز برانچ اور مقامی پولیس کی انکوائری رپورٹ پر تھانہ صدر پولیس نے گذشتہ شب ملزمان غلام باقر اس کے بھائی شہباز پسران محمد عاشق،شہباز کی بیوی سمیرا بی بی اور باقر کے بیٹے زاہد کے خلاف زیر دفعہ 365ت پ مقدمہ درج کر لیا مدعی مقدمہ ارشاد کے مطابق ملزمان کو شک تھا کہ میرے بیٹے عارف کے شہباز کی بیوی سمیرا سے مبینہ مراسم تھے محمد ارشاد نے ڈی پی او وہاڑی سے اپیل کی ہے کہ اس کے بیٹے کے قاتلوں کو گرفتار کر کے مقتول کی نعش برآمد کی جائے۔