ٹی ایچ کیو ہسپتال کی مرمت و تزئین و آرائش کے منصوبہ نے مریضوں اور ڈاکٹرز کو شدید مشکلات سے دو چار کر دیا
بورے والا(چوہدری اصغر علی جاوید سے)ٹی ایچ کیو ہسپتال بورے والا کی مرمت و تزئین و آرائش کے منصوبہ نے مریضوں اور ڈاکٹرز کو شدید مشکلات سے دو چار کر دیا،ٹھیکیدار نے ہسپتال کی پوری بلڈنگ خالی کروا کے ڈاکٹرز کو خیموں اور مریضوں کو فرش پر بیٹھنے پر مجبور کر دیا، صورتحال انتہائی تشویشناک ہو گئی،حکومت،منتخب نمائندوں اور ضلعی انتظامیہ نے چشم پوشی اختیار کر لی،شہریوں میں شدید ردعمل،تفصیلات کے مطابق 10لاکھ سے زائد آبادی کیلئے قائم واحد تحصیل ہیڈ کوارٹر ہسپتال مریضوں کو طبی سہولتوں کی فراہمی کی بجائے انکے لیے وبال جان بن گیا 4ماہ قبل پنجاب حکومت کی طرف سے غیر ضروری طور پر 4کروڑ سے زائد کی خطیر رقم سے ہسپتال کی مرمت و تزئین و آرائش کے منصوبے پر کام کا آغاز ہوا جس میں ٹھیکیدار نے 3ماہ کے اندر ہسپتال کی بلڈنگ کا نصف حصہ مکمل کرکے انتظامیہ کے حوالے کرنا تھا لیکن ناقص منصبوبہ بندی اور ٹھیکیدار کی مجرمانہ غفلت کے نتیجہ میں ہسپتال کے نصف حصہ کی مرمت و تزئین و آرائش مکمل نہ ہو سکی اور ٹھیکیدار نے زبردستی دیگر زیر استعمال بلڈنگ کا بقیہ حصہ بھی خالی کروا کے تمام ڈاکٹرز،ایمرجنسی وارڈ،مردانہ و زنانہ وارڈ اور آﺅٹ ڈور کو ہسپتال سے باہر نکال کر اُسکے احاطہ میں ٹینٹ لگا کر بیٹھنے پر مجبور کر دیا دور دراز سے آنے والے سینکڑوں مریض سارا دن فرش پر بیٹھ کر اپنی باری کا انتظار کرتے رہنے اور 2بجے مایوس گھروں کو لوٹ جانے پر مجبور ہو جاتے ہیں جبکہ ان میں سے اکثر مریض طبی امداد کیلئے مہنگے ترین پرائیویٹ ہسپتالوں کا رُخ کر لیتے ہیں ہسپتال میں آکر ٹوکن کے حصول کیلئے مرد و خواتین مشترکہ لائینوں میں کھڑے ہو کر دھکم پیل کا شکار ہو جاتے ہیں ٹھیکیدار کی مجرمانہ غفلت اور اس غیر ضروری منصوبے میں بلا جواز تاخیر نے صورتحال انتہائی افسوسناک بنا دی ہے اس تمام تر صورتحال کو دیکھتے ہوئے بھی منتخب عوامی نمائندوں،پنجاب حکومت،محکمہ صحت اور ضلعی انتظامیہ نے چشم پوشی اختیار کر لی ہے جس پر مقامی سیاسی،سماجی،کاروباری،مذہنی اور دیگر شعبہ ہائے زندگی کی تنظیموں نے وزیر اعلیٰ پنجاب سے فوری نوٹس لینے کا مطالبہ کیا ہے۔
About Author
