محکمہ ٹریفک،پیٹرولنگ پولیس اور اراضی ریکارڈ سنٹر کی لوٹ مار سے کسانوں کا معاشی استحصال کیا جا رہا ہے۔ذوالفقار اعوان
بورے والا(چوہدری اصغر علی جاوید سے)پاکستان کسان اتحاد کے ضلعی صدر ملک ذوالفقار اعوان نے کہا ہے کہ مختلف سرکاری محکموں کی کسانوں کے ساتھ مبینہ غنڈہ گردی اور کسان کش پالیسیوں کے خلاف کسان اب خاموش نہیں رہیں گے،محکمہ ٹریفک پولیس،پیٹرولنگ پولیس اور اراضی ریکارڈ سنٹر کی لوٹ مار سے کسانوں کا معاشی استحصال کیا جا رہا ہے، اراضی ریکارڈ سنٹر نے انتقال کی فیس 15سو سے بڑھا کر 5ہزار کر دی ہے جو سراسر ظلم ور معاشی قتل ہے،غریب کسان اپنی زرعی اجناس لیکر دیہات سے منڈیوں تک آتا ہے جنہیں راستے میں پیٹرولنگ اور ٹریفک پولیس کا عملہ روک کر لوٹ مار کرتا ہے جبکہ شہر کی مختلف شاہراہوں پر ٹریفک اور پیٹرولنگ کے عملہ کی مجرمانہ غفلت سے آئے روز حادثات میں انسانی جانوں کا ضیاع ہو رہا ہے، ٹریفک اور پیٹرولنگ کا عملہ ٹریفک کو رواں دواں رکھنے اور ٹریفک قوانین پر عملدرآمد کی بجائے مختلف شاہراہوں پر ناکے لگا کر کسانوں اور عام شہریوں سے لوٹ مار میں مصروف رہتے ہیں جس کے خلاف یکم اپریل کو ضلع بھر میں کسان بھر پورا احتجاج کریں گے اور حالات کی ذمہ داری کرپٹ اہلکاران پر عائد ہو گی،ان خیالات کا اظہا ر انہوں نے کسان اتحاد کے ہنگامی اجلاس سے خطاب کرتے ہوئے کیا اجلاس سے جنرل سیکرٹری کسان اتحاد محمد مہران،ندیم سجاد،محبوب خاں سلدیرا،چوہدری محمد اصغر،محمد طیب واہلہ،ریاض احمد خاں جملیرا،میاں محمد شفیق،حسن چیمہ،مشتاق احمد اور چوہدری محمد یٰسین نے بھی خطاب کیا۔
About Author
