قرآن حکیم سے دوری مسلمانوں کی پریشانیوں اور مصائب کی بنیادی وجہ ہے۔قاری محمد طیب،حافظ یاسر راشدی
بورے والا(چوہدری اصغر علی جاوید سے)مرکزی جامع مسجد ڈی بلاک میں تکمیل حفظ قرآن مجید کے حوالے سے ایک پروقار تقریب کا انعقاد کیا گیا جس میں اسلامک ایجوکیشن بورڈ پاکستان کے صدر معروف عالم دین مولانا قاری محمد طیب حنفی مہتمم جامعہ حنفیہ بورے والا نے حفاظ کرام کو آخری سبق پڑھایا اور اسناد تقسیم کیں اس موقع پر انہوں نے طلباء سے خطاب کرتے ہوئے کہا کہ قرآن مجید ایک مکمل دستور حیات ہے قرآن حکیم سے دوری مسلمانوں کی پریشانیوں اور مصائب کی بنیادی وجہ اور سبب ہے قرآن حکیم کو سینے سے لگا کر اور عملی زندگی میں اپنا کر ہی دین و دنیا کی کامیابیاں حاصل کی جا سکتی ہیں تقریب سے خطاب کرتے ہوئے خطیب جامع مسجد ڈی بلاک مولانا حافظ محمد یاسر راشدی نے کہا کہ ہم اپنی نسل کو قرآن اور مسجد کے ساتھ وابستہ رکھ کر ہی ان کے ایمان کی حفاظت کر سکتے ہیں خوش قسمت ہیں وہ والدین جن کے بچے قرآن کریم کی حفاظت کی ذمہ داری اٹھا رہے ہیں کل قیامت کے روز حافظ قرآن سے کہا جائے گا کہ وہ قرآن پڑھتا جائے اور جنت کے زینے چڑھتا جائے ادارے کی کارکردگی کے حوالے سے گفتگو کرتے ہوئے علامہ یاسر راشدی نے بتایا کہ 1996ء سے شروع کی گئی حفظ قرآن کی کلاسز سے اب تک 181طالبعلم قرآن پاک حفظ کی سعادت حاصل کر چکے ہیں آخر میں حافظ محمد راشد،صفی اللہ، محسن فراز،عبدالرحمٰن،عبداللہ،ابوھریرہ،فہد مجید،عثمان،احمد داود،حامد ممتاز،حبیب الرحمن،احمد الحسان اور حماد الرحمن کو پھولوں کے ہار اور شرکاء کی طرف سے مبارکباد پیش کی گئی ایمان افروز تقریب کے اختتام پر اجتماعی دُعا میں شہریوں کی کثیر تعداد نے شرکت کی۔
About Author
