ڈاکو شہری سے کار چھین کر فرار ہونے کے بعد بدحواسی کے عالم میں کیری ڈبہ سے ٹکرا گئے

بورے والا(چوہدری اصغر علی جاوید سے)کمانڈ و وردی میں ملبوس ڈاکو شہری سے کار چھین کر فرار ہونے کے بعد بدحواسی کے عالم میں کیری ڈبہ سے ٹکرا گئے،شہریوں نے ایک ڈاکو کو اسلحہ سمیت پکڑ کر پولیس کے حوالے کر دیا جبکہ ڈاکو کا ساتھی موقع سے فرار،ڈاکوﺅں نے وقوعہ سے ایک گھنٹہ قبل بورے والا شہر سے مختلف دو وارداتوں میں ایک موٹر سائیکل اور چوکیدار سے پسٹل چھینا تھا،تفصیلات کے مطابق آصف علی جٹ سکنہ 265ای بی چک نمبر267ای بی سے محفل میلاد میں شرکت کے بعد اپنی کار سوزوکی مہران نمبری5640ایس ایل جے پر گزشتہ شب ساڑھے ایک بجے کے قریب واپس اپنے گھر آ رہا تھا کہ چک 265ای بی کی حدود میں موٹر سائیکل پر سوار دو نامعلوم ڈاکوﺅں نے اسلحہ کے زور پر اسے روک لیا اور کار چھین کر اڈہ مانا موڑ کی طرف فرار ہو گئے ڈاکوﺅں نے پہلے سے چھینی ہوئی موٹر سائیکل وہاں پر پھینک دی شہریوں نے ڈاکوﺅں کا تعاقب کیا تو پولیس پٹرولنگ پوسٹ سے تھوڑا آگے پٹرول پمپ کے قریب ڈاکوﺅں کی کار بدحواسی میں سامنے سے آنے والے ایک کیری ڈبہ 9606ایل ای اے سے ٹکرا گئی ایک ڈاکو کو شہریوں نے موقع ایکسیڈنٹ پر پکڑ کر پولیس کے حوالے کر دیا پکڑے جانے والے ڈاکو کی شناخت طاہر سکنہ ملتان کے نام سے ہوئی ہے اور اس نے کمانڈو وردی پہنی ہوئی تھی جو کہ گگو منڈی کی ایک سیاسی شخصیت کا سابق گن مین بتایا جاتا ہے ڈاکو کا ساتھی موقع سے فرار ہو گیا انہی ڈاکوﺅں نے ایک گھنٹہ قبل بورے والا کے محلہ فضل آباد میں شجاع الرحمان نامی شخص سے ایک موٹر سائیکل چھینا اور اسی محلہ میں موجود چوکیدار سے پسٹل چھینا تھا جبکہ سیٹلائٹ ٹاﺅن میں بابر بھٹی کے گھر میں ڈکیتی کرنے کی کوشش کی اہل خانہ کی مزاحمت پر فائرنگ کا تبادلہ ہوا جس کے نتیجہ میں ڈاکو موقع سے فرار ہو گئے بتایا جاتا ہے کہ یہ چار ڈاکوﺅں کا ایک منظم گروہ ہے جو کہ ایک ملزم کی بہن کے گھر فضل آباد میں رہائش پزیر تھے ڈاکو کے پکڑے جانے کے بعد اس کی بہن اور بہنوئی اپنے گھر کو تالے لگا کر فرار ہو گئے ہیں پولیس مصروف تفتیش ہے مزید انکشافات کی توقع ہے۔