میپکو ڈویژن نے چار ماہ میں نا دھندگان سے9 ارب سے زائد کی ریکوری کی۔ملک وسیم اختر

بورے والا(چوہدری اصغر علی جاوید سے)میپکو ڈویژن بورے والا کی بجلی چوروں اور نادھندگان کے خلاف چار ماہ کی ریکارڈ کارکردگی،نادھندگان سے 9 ارب سے زائد کی ریکوری،بجلی چوروں کے خلاف 429 مقدمات درج کروا کے 32 کروڑ سے زائد جرمانے وصول،میپکو ریجن میں مجموعی طور پر 105 فیصد ریکوری کے ساتھ پہلا نمبر حاصل کر لیا،میپکو ڈویژن بورے والا کے ڈپٹی منیجر آپریشن ملک وسیم اختر کی طرف سے جاری کردہ اعدادوشمار کے مطابق میپکو ڈویژن بورے والا کے پانچ سب ڈویژنوں نے حکومت کی جانب سے بجلی چوروں اور نادھندگان کے خلاف جاری خصوصی مہم کے دوران گزشتہ چار ماہ کے قلیل عرصہ میں نادھندگان سے مجموعی طور پر 9 ارب 4 کروڑ کے خطیر رقم وصول کی جس میں کسان اتحاد کے ڈیڈ ڈیفالٹرز سے مجموعی طور پر 2 ارب 85 کروڑ کی ریکوری بھی شامل ہے اس دوران میپکو کی ٹیموں نے مختلف مقامات پر کاروائی کرتے ہوئے بجلی چوروں کے خلاف 429مقدمات درج کروا کے ان سے جرمانہ کی صورت میں 32 کروڑ روپے وصول کئے گئے ہیں بجلی چوری اور نا دھندگان سے وصولیوں کے حوالہ سے میپکو ڈویژن بورے والا نے 105 فیصد ریکوری کر کے پورے میپکو ریجن میں پہلی پوزیشن حاصل کی ہے جبکہ لائن لاسسز میں بھی گزشتہ سال کی نسبت کمی واقع ہوئی ہے ڈپٹی منیجر آپریشن ملک وسیم اختر کا کہنا ہے کہ ہمارا ادارہ صارفین کی سہولت کیلئے کام کر رہا ہے کسی بھی صارف کو اگر کوئی شکایت یہ مسئلہ درپیش ہو تو وہ براہ راست میرے ساتھ رابطہ کریں کسی تنظیم یا کسی ایجنٹ کا سہارا نہ لیں تاکہ ان سے کوئی زیادتی نہ ہونے پائے۔