اشتہاری ملزم کی موجودگی کے شبہ میں دو تھانوں کی پولیس کا دھاوا،جہیز کا سامان لوٹ لیا
بورے والا(چوہدری اصغر علی جاوید سے)تھانہ شیخ فاضل کی حدود میں اشتہاری ملزم کی موجودگی کے شبہ میں دو تھانوں کی پولیس کا مخالف گروپ کے درجن سے زائد افراد کے ہمراہ دھاوا،چادر چار دیواری کا تقدس پامال،گھر میں گھس کر تہس نہس کر دیا،توڑ پھوڑ،زیورات،مال مویشی،دو بیٹیوں کے جہیز کی لوٹ مار اور خواتین پر تشدد،اشتہاری ملزم کی مبینہ فائرنگ سے مخالف زخمی،پولیس نے لوٹ مار اور تشدد کی تردید کر دی،تفصیلات کے مطابق تھانہ ملکہ ہانس پولیس نے تھانہ شیخ فاضل پولیس اور درجن سے زائد پرائیویٹ افراد کے ہمراہ ایک مقدمہ کے اشتہاری ملزم شفیق عرف بھولا سکنہ 415 (ای بی) کی گھر میں موجودگی کے شبہ میں گرفتاری کیلئے اسکے والد فلک شیر بھٹی کے گھر پر چھاپہ مارا گیٹ بند ہونے پر پولیس اور انکے ساتھ آئے پرائیویٹ افراد نے دیوار گراتے ہوئے گھر کے اندر دھاوا بول دیا گھر میں داخل ہو کر گھر کو توڑ پھوڑ کرتے ہوئے تہس نہس کر دیا الیکٹرانکس کا سامان توڑنے کے علاوہ فلک شیر کی دو بیٹیوں کے جہیز کا سامان،زیورات،قیمتی اشیاء اور مال مویشی لوٹ کر مزاحمت پر خواتین سمیت دیگر اہل خانہ کو تشدد کا نشانہ بنایا ابھی پولیس اور پرائیویٹ افراد گھر سے چند ایکٹر کے فاصلہ پر ہی پہنچے تو نامعلوم شخص نے فائرنگ کر دی جس سے پولیس کے ساتھ آنے والا انکا مخالف شخص تنویر ولد امیر حسین سکنہ 413 (ای بی) شدید زخمی ہو گیا متاثرہ خاندان کی طرف سے پولیس اور انکے مخالفین کی گھر میں گھس کر کی جانے والی لوٹ مار،تشدد اور چادر چار دیواری کا تقدس پامال کرنے کے خلاف ڈی پی او وہاڑی سے نوٹس لینے کا مطالبہ کیا ہے انکا کہنا ہے کہ جس اشتہاری ملزم شفیق کو پولیس پکڑنے آئی تھی وہ انکے گھر نہیں رہتا نہ ہی وہ کبھی گھر آیا تھا لیکن انکے مخالفین جن سے انکی مقدمہ بازی چل رہی تھی انہوں نے پولیس سے مل کر یہ غنڈہ گردی کی ہے جبکہ پولیس کے مطابق سامان کی توڑ پھوڑ اور لوٹ مار سے انکا کوئی تعلق نہیں ہم صرف اشتہاری ملزم کی گرفتاری کیلئے ملکہ ہانس پولیس کے ہمراہ گئے تھے جہاں سے اشتہاری ملزم نے فرار ہوکر فائرنگ کر دی جس سے ایک شخص شدید زخمی ہوا ہے جسکی کاروائی کر رہے ہیں۔
About Author
