پولیس نے 300 سے زائد منشیات فروشوں کو گرفتار کر کے حراست میں لے لیا۔عیسی خاں

بورے والا(چوہدری اصغر علی جاوید سے)ڈی پی او وہاڑی عیسی خاں سکھیرا نے کہا ہے کہ گزشتہ 3 ماہ کے دوران ضلع وہاڑی پولیس نے منشیات کے خلاف کریک ڈاون کر کے 300 سے زائد منشیات فروشوں کو حراست میں لے کر ان سے کروڑوں روپے مالیت کی 528 کلو سے زائد چرس،32 کلو سے زائد ہیروئین،40 کلو افیون اور 34 کلو بھنگ برآمد کر لی اسکے علاوہ 386 شراب فروشوں سے 20 ہزار لیٹر سے زائد شراب بھی برآمد کی،منشیات فروشوں کے خلاف کریک ڈاون کے بعد اگلے مرحلہ میں منشیات کے عادی افراد کی بحالی شروع کر دی گئی ہے اس سلسلے میں پولیس کی جانب سے اپنی مدد آپ کے تحت رورل ہیلتھ سینٹر ساہوکا میں “نشے سے بحالی اور روزگار تک کا سفر” کے پائلٹ پراجیکٹ کو شروع کیا گیا جس میں ضلع وہاڑی کی مختلف گرین بیلٹس اور شاہراہوں پر موجود نشے کے عادی افراد کو سرکاری گاڑی میں باعزت طریقے سے ریہبیلیٹیشن سنٹر تک لایا گیا اور ایک بہترین علاج و رہائش کی سہولیات دے کر ایک پروقار تقریب میں روزگار کے مواقع فراہم کر کے انکی فیملیز کے حوالے کر دیا گیا اسی سفر کے دوسرے مرحلے میں RHC لڈن میں ایک بحالی مرکز کا قیام عمل میں لایا گیا ہے جس میں 41 نشے کے عادی افراد کو باعزت طور سرکاری گاڑی میں لا کر RHC لڈن میں داخل کروایا گیا ہے انکی گرومنگ اور ہیلتھ سکریننگ کے بعد انکے علاج معالجے کے بہترین انتظامات کیے گئے ہیں پچھلی بار کی طرح ایچ آئی وی سے متاثرہ افراد کا علاج الگ سے ایک پرائیویٹ NGO سے کروایا جا رہا ہے،ان خیالات کا اظہار انہوں نے پریس کلب بورے والا کے عہدیداران سے گفتگو کرتے ہوئے کیا انہوں نے کہا کہ ان معاشرے کے ٹھکرائے ہوئے افراد کو باعزت طریقے سے تین وقت کا کھانا،علاج اور گرومنگ کے ساتھ ساتھ بہترین رہائش کی سہولت فراہم کرنا ہمارا فخر ہے وہاڑی پولیس ضلعی انتظامیہ،سوشل ویلفیئر ڈپارٹمنٹ اور پرائیویٹ NGO کے تعاون سے ان نشے کے عادی افراد کو باعزت اور کارآمد شہری بنانے کیلئے پر جوش اور پرعزم ہیں۔