بجلی چوری میں گذشتہ سال کے مقابلہ میں50فیصد سے زائد کمی واقع ہوئی ہے ۔ ساجد حسین گوندل

بورے والا(چوہدری اصغر علی جاوید سے)ایکسئین میپکو ڈویژن بورے والا ساجد حسین گوندل نے کہا ہے کہ بجلی چوری میں گذشتہ سال کے مقابلہ میں50فیصد سے زائد کمی واقع ہوئی ہے جبکہ بجلی چوروں سے جرمانوں کی شکل میں کروڑوں روپے کا ریونیو وصول کیا گیا ہے،نئے ٹرانسفارمرز اور نئی تاروں کی تنصیب سے جہاں عوام کو بلاتعطل بجلی کی فراہمی میں مدد ملی ہے وہاں سالانہ لائن لاسسز پر بھی ممکنہ حد تک قابو پایا گیا ہے،بجلی کے بلوں میں اضافہ کی بنیادی وجہ بجلی کے بلاتعطل استعمال میں اضافہ ہے نادھندگان سے بقایا جات کی وصولی کے لیے انہیں اقساط کی سہولت دی جا رہی ہے صارفین کو اپنے ذمہ واجب الادا بلوں کی ادائیگی قومی فریضہ سمجھ کر کرنی چاہئے،حکومت کی طرف سے تمام تنصیبات کو اپ گریڈ کرنے پر کروڑوں روپے کے منصوبے مکمل کیے گئے ہیں مختلف فیڈرز پر اوور لوڈنگ کے خاتمے کے لیے گگومنڈی اور ماچھیوال میں نئے گرڈ اسٹیشنوں کے قیام کا منصوبہ مکمل ہونے کے بعد بورے والا گرڈ اسٹیشن پر دباﺅ کم ہو جائے گا ہماری کوشش ہے کہ صارفین کی شکایات کو کم سے کم وقت میں دور کیا جائے جس کے لیے واپڈا افسران اور دیگر عملہ عوام کو زیادہ سے زیادہ ریلیف فراہم کرنے کی ہر ممکن کوشش کر رہا ہے،بورے والا ڈویژن میں صارفین سے پچھلے سال بجلی کے بلوں کی مد میں 7ارب روپے وصول کیے گئے،ان خیالات کا اظہار انہوں نے ”ایمرا“آفس میں الیکٹرانک و پرنٹ میڈیا کے نمائندوں سے گفتگوکرتے ہوئے کیا اس موقع پر واپڈا ہائیڈرو الیکٹرک سنٹرل لیبر یونین کے زونل چیئرمین شاہد باری چوہان بھی موجود تھے۔