حضرت دیوان چاولی مشائخ کے مزار سے ملحقہ13سو سال پرانے قدیم تاریخی قبرستان کی قبریں صفحہ ہستی سے مٹ گئیں
بورے والا(چوہدری اصغر علی جاوید سے)برصغیر کے قدیم تاریخی قبرستان محکمہ اوقاف کی مجرمانہ غفلت سے سیوریج کا گندہ پانی داخل ہونے سے سینکڑوں تاریخی قبریں صفحہ ہستی سے مٹ گئیں،13سو سال پرانے قبرستان کی حالت زار پر اہل علاقہ کا احتجاج،تفصیلات کے مطابق بورے والا کے نواحی قصبہ دیوان صاحب میں برصغیر پاک ہند کے مشہور صوفی بزرگ حضرت دیوان چاولی مشائخ کے مزار سے ملحقہ13سو سال پرانے قدیم تاریخی قبرستان جس میں اسلامی تاریخ کے کئی اہم بزرگان دین کی قبریں بھی موجود تھیں محکمہ اوقاف کے افسران اور عملہ کی چشم پوشی سے چند ماہ قبل مزار کی لیٹرنیوں اور ملحقہ آبادی کے سیوریج کا گندہ پانی اس تاریخی قبرستان میں چھوڑ دیا گیا اور چند ماہ کے دوران ہی اسلامی تاریخ کا یہ قدیم قبرستان گندے پانی کے جوہڑ میں تبدیل ہونے لگا ہے اس قبرستان میں حضرت دیوان چاولی مشائخ کے ساتھ13سو سال قبل دین اسلام کی تبلیغ کرنے والے کئی برزگان دین کی قبریں بھی صفحہ ہستی سے مٹ چکی ہیں جبکہ پانی کا تیز بہاﺅ بتدریج اس تاریخی قبرستان کو ملیا میٹ کرتا جا رہا ہے سیوریج کے گندے پانی سے جہاں سینکڑوں قبریں منہدم ہو چکی ہیں وہاں اس علاقہ اور بالخصوص روحانی درگاہ کے احاطہ میں تعفن پھیل چکا ہے مقامی علاقہ مکینوں شاہ بہرام،محمد ریاض،ندیم انجم سندھو،پیر فاروق نظامی،چوہدری عباس چیمہ کونسلر،پیر خضر حیات،پیر محمد صدیق،پیر آصف نظامی اور دیگر نے احتجاج کرتے ہوئے کہا کہ محکمہ اوقاف نے انتہائی بے حسی اختیار کر رکھی ہے حالانکہ اس درگاہ سے سالانہ کروڑوں روپے کا چندہ اکٹھا ہوتا ہے جو محکمہ اوقاف دربار اور اُسکے احاطہ میں موجود قدیم تاریخی قبرستان کی حفاظت اور دیکھ بھال پر خرچ کرنے کی بجائے نجانے کہاں خرچ کرتا ہے محکمہ اوقاف کا منیجر ہر وقت یہاں موجود ہوتاہے اور سب کچھ دیکھتے ہوئے بھی انہوں نے آنکھیں بند کر رکھی ہیں ہماری آنکھوں کے سامنے ہمارے بزرگوں کی قبریں صفہ ہستی سے مٹ رہی ہیں انہوں نے وزیر اعلیٰ پنجاب اور سیکرٹری اوقاف سے فوری نوٹس لینے کا مطالبہ کیا ہے اس سلسلہ میں جب ایڈمنسٹریٹر اوقاف پاکپتن طاہر احمد سے رابطہ کیا تو وہ اس سارے معاملہ سے بے خبر تھے انہوں نے کہا کہ ان تاریخی مقامات اور قبرستان کی دیکھ بھال اور حفاظت ہماری ذمہ داری ہے متعلقہ منیجر اوقاف سے اسکی رپورٹ طلب کرنے کے علاوہ میں خود موقع پر جا کر اس مسئلے کے حل کے لیے عملی اقدامات اٹھاﺅں گا۔
About Author
