بورے والا سمیت ضلع بھر کے38مختلف دیہات میں 50سال سے قائم دیہی مراکز صحت پر جانوروں کا قبضہ
بورے والا(چوہدری اصغر علی جاوید سے)بورے والا سمیت ضلع بھر کے38مختلف دیہات میں 50سال سے قائم دیہی مراکز صحت پر جانوروں کا قبضہ،چھتوں اور دروازوں کے بغیر کمرے بھوت بنگلوں کا منظر پیش کرنے لگے،روازانہ سینکڑوں مریض علاج معالجہ سے محروم،تفصیلات کے مطابق عرصہ50سال سے ضلع وہاڑی کے مختلف دیہات میں حکومت کی طرف سے بنائے گئے مراکز صحت کھنڈرات میں تبدیل ہو کر بھوت بنگلوں کا منظر پیش کرنے لگے ہیں ان مراکز صحت پر کوالیفائیڈ ڈاکٹرز کی بجائے ڈسپنسر سے کام چلایا جارہا ہے یہ ڈسپنسر بھی ہفتہ میں ایک یا دو دن آتے ہیں اور اپنی تنخواہ پکی کرنے کے لئے کچھ دیر بیٹھنے کے بعد حاضری لگا کر واپس چلے جاتے ہیں ایسا ہی ایک دیہی مرکز صحت نواحی گاﺅں 142ای بی بورے والا میں بھی موجود ہے جو ملحقہ چھ سات دیہات کے عوام کو طبی سہولیات فراہم کرنے کی بجائے کھنڈرات میں تبدیل ہو گیا ہے دو ایکڑر ارضی پر قائم اس مرکز صحت کے کمروں کی چھتیں خستہ حالی کا شکار ہیں ان چھتوں کے نیچے بیٹھنا کسی خطرے سے خالی نہیں کمروں کے دروازے ٹوٹ پھوٹ چکے ہیں ڈبوں میں بند لاکھوں روپے کی ادویات پڑے پڑے زائد العیاد ہو جاتی ہیں کوئی چار دیواری نہ ہونے سے گاوں کے بااثر افراد نے اس طبی مرکز کے احاطہ میں مال مویشی باندھ رکھے ہیں گاوں کے گندے پانی کا نالہ اس میں سے گزرتا ہے اور سارا دن یہاں تعفن پھیلا رہتا ہے مریضوں کو بیٹھنے کی جگہ تو میسر نہیں لیکن جانوروں کو یہاں آرام کرنے کی مکمل سہولت میسر ہے مقامی لوگوں کے لئے اس طبی مرکز سے مفت علاج معالجہ کی سہولت خواب بن چکی ہے سالانہ لاکھوں روپے کی ادویات میں سے مقامی لوگوں کو ایک گولی بھی میسر نہیں علاقہ مکینوں نے اس حکومتی عدم توجہ پر شدید احتجاج کرتے ہوئے حکومت سے مطالبہ کیا ہے کہ ان ضلعی طبی مراکز کی حالت زار فوری طور پر بہتر بنا کر علاج معالجہ کی سہولت یقینی بنائی جائے اور ان مراکز پر ایک کوالیفائیڈ ڈاکٹر بھی تعینات کیا جائے۔
About Author
