قیام پاکستان کے وقت بچھڑے بہن بھائی 75 سال بعد ایکدوسرے کو مل گئے

بورے والا(چوہدری اصغر علی جاوید سے)قیام پاکستان کے وقت بچھڑنے والے بہن بھائی 75 سال بعد ایکدوسرے کو مل گئے،اودھم سنگھ کا خاندان تقسیم ہند کے وقت چیچہ وطنی کے نزدیک 37/12L سکھاں والی میں رہائش پذیرتھا قیام پاکستان کے وقت اودھم سنگھ کا خاندان انڈیا ہجرت کر گیا جبکہ 7 سالہ مون سنگھ ان سے بچھڑ کر گاؤں میں ہی رہ گیا تھا مون سنگھ کو گاؤں کے نمبردارمحمد دین نے انسانیت کی مثال قائم کرتے ہوئے اپنا بیٹا بنا کر اسکا نام عبدالخالق رکھ دیا تھا سوشل میڈیا پر وڈیو وائرل ہونے پر کینیڈا میں مقیم اس کی بہن نرمل کور نے بھائی کے ایک ہاتھ کے تین انگوٹھوں سے اسے شناخت کر لیا دونوں بہن بھائیوں کے ملتے وقت رقت آمیز مناظر،تفصیلات کے مطابق بورے والا کے نواحی گاؤں 371 ای بی میں رہائش پذیر 82 سالہ عبدالخالق تقسیم ہند سے قبل چیچہ وطنی کے گاؤں 37/12L سکھاں والی میں اپنے والد اودھم سنگھ،والدہ سردارنی مہند نجم،نانا سردار پری سنگھ،نانی آساکور،بہن نرمل کور بسرا اور دیگررشتہ داروں سمیت رہائش پذیر تھا قیام پاکستان کا اعلان ہوتے ہی مون سنگھ(عبدالخالق) کا سارا خاندان جالندھر انڈیا ہجرت کر گیا اور وہاں سے کینڈا شفٹ ہو گئے جبکہ 7 سالہ مون سنگھ اپنے خاندان سے بچھڑ کر گاؤں میں ہی رہ گیا جس کو گاؤں کے نمبردار محمد دین راجپوت نے انسانیت کی مثال قائم کرتے ہوئے گود لیکر اپنا بیٹا بنا لیا اور 12 ایکڑ اراضی بھی اس کے نام کر دی گزشتہ دنوں عبدالخالق (مون سنگھ) کی سوشل میڈیا پر وڈیو وائرل ہوئی تو کینیڈا میں مقیم اس کی بہن نرمل کور بسرا نے ایک ہاتھ کے تین انگوٹھوں کی نشانی سے اپنے بھائی مون سنگھ (عبدالخالق) کو پہچان لیا اور اپنے خاوند بلدیب سنگھ بسرا،کزن ہریندرسنگھ اوراس کی بیوی کلبیر کورنجر سمیت 75 سال سے بچھڑے اپنے بھائی مون سنگھ(عبدالخالق) کو ملنے نواحی گاوں 371 ای بی پہنچ گئے دونوں بہن بھائی گلے ملتے وقت جذباتی ہو گئے اس خوشی کے موقع پر انکی آنکھوں سے بے اختیار آنسو چھلک پڑے اس موقع پرگفتگو کرتے ہوئے نرمل کور بسرا نے کہا کہ پاکستانی قوم کی شکر گزار ہوں جنہوں نے میرے بھائی کی حفاظت کی اور آج میں اس سے مل رہی ہوں عبدالخالق (مون سنگھ) اس وقت 82 سال کے ہیں جو بہن سے اور دیگررشتہ داروں سے مل کربہت خوش تھا۔