ڈسٹرکٹ جیل وہاڑی میں اقدام قتل کا قیدی ڈی ایس پی کا بھائی پرسرار طور پر ہلاک

بورے والا(چوہدری اصغر علی جاوید سے)ڈسٹرکٹ جیل وہاڑی میں اقدام قتل کا قیدی ڈی ایس پی کا بھائی پرسرار طور پر ہلاک،موت ہارٹ اٹیک سے ہوئی،جیل ذرائع،نشے سے موت واقع ہونے کا شبہ،نعش پوسٹ مارٹم کے بعد ورثاء کے حوالے،خون کے نمونہ جات لیکر لیبارٹری روانہ کر دیئے،پولیس ذرائع،تفصیلات کے مطابق چار سال قبل ڈی بلاک کے رہائشی خرم سلدیرا نے گھریلو جھگڑے پر اپنی بھابھی خالدہ سلدیرا کو فائرنگ کر کے زخمی کر دیا تھا تھانہ ماڈل ٹاﺅن پولیس بورے والا نے خالدہ سلدیرا کی درخواست پر مقدمہ درج کر کے ملزم کو گرفتار کرنے کے بعد تفتیش مکمل کر کے چالان عدالت کے سپرد کر دیا تھا جبکہ خرم کو جیل بھیج دیا گیا تھا دو سال قبل مقدمہ کی سماعت کے بعد مقامی ایڈیشنل سیشن جج نے مقدمہ کا فیصلہ سناتے ہوئے ملزم خرم سلدیرا کو چھ سال قید کی سزا سنا دی تھی اور وہ جیل میں سزا کاٹ رہا تھا گزشتہ روز جیل میں اسکی اچانک طبیعت خراب ہوئی تو جیل میں کوئی ڈاکٹر موجود نہ تھا جسے ڈی ایچ کیو ہسپتال وہاڑی منتقل کیا گیا لیکن تاخیر سے پہنچنے کی وجہ سے وہ جان کی بازی ہار گیا جسے جیل حکام نے ہارٹ اٹیک قرار دیکر اسکی نعش پوسٹ مارٹم کے بعد نعش ورثاء کے حوالے کر دی تاہم قیدی خرم سلدیرا کی موت نشہ سے ہونے کا شبہ ظاہر کیا جا رہا ہے پولیس نے نعش سے خون کے نمونہ جات و دیگر مواد فرانزک لیب روانہ کر دیا جسکی رپورٹ آنے پر موت کی اصل وجہ معلوم ہو سکے گی واضح رہے کہ جیل میں جاں بحق ہونے والا قیدی خرم سلدیرا ڈی ایس پی پولیس حبیب خاں سلدیرا کا چھوٹا بھائی تھا۔