ضلعی انتظامیہ نے بورے والا شہر کو لاوارث بنا دیا،شاہراہیں کھنڈر میں تبدیل،کروڑوں کے فنڈز خورد برد
بورے والا(چوہدری اصغر علی جاوید سے)ضلعی انتظامیہ نے بورے والا شہر کو لاوارث بنا دیا،اندرون شہر اور دیگر تمام چھوٹی بڑی شاہراہیں کھنڈر میں تبدیل،دہلی ملتان روڈ بدترین صورتحال سے دوچار ہو گئی،مرمت کے نام پر کروڑوں کے فنڈز خورد برد،قومی شاہراہوں کی ابتر صورتحال سے ٹریفک حادثات میں اضافہ اور گاڑیاں کھٹارا بن گئیں،کروڑوں کے ترقیاتی فنڈز مختلف قسم کے ماڈلز اور رنگ روغن میں جھونک دیئے گئے،وزیر اعلیٰ پنجاب سے نوٹس لینے کا مطالبہ،تفصیلات کے مطابق بار ایسوسی ایشن کے صدر نوید احمد چیمہ،ٹرانسپورٹ یونین کے صدر سردار شاہد ڈوگر،انجمن تاجران کے صدر چوہدری شوکت علی،چیئرمین شہزاد مصطفی چوہان،سول سوسائٹی نیٹ ورک کے سید زاہد حسین مشہدی،ایس ڈبلیو سی ڈی ایس کے صدر محمد شیر خاں کھچی،انجمن آڑھتیاں کے صدر ندیم انور چوہدری،نیو سبزی منڈی کے صدر حاجی عاشق علی آرائیں اور دیگر نمائندہ شہری تنظیموں کے عہدیداران نے شہر کی موجودہ صورتحال بارے گفتگو کرتے ہوئے کہا ہے کہ بورے والا شہر جو کہ پنجاب میں آبادی کے لحاظ سے 13واں بڑا شہر ہونے کے علاوہ خوبصورتی اور مختلف حوالوں سے ایک انفرادیت کا حامل شہر ہونے کے باوجود گزشتہ دو سال کے دوران اس شہر کو ضلعی انتظامیہ نے مکمل لاوارث بنا دیا ہے اندرون شہر کی تمام سڑکیں اور اہم قومی شاہراہ دہلی ملتان روڈ جو مصروف ترین شاہراہ ہے یہ بری طرح ٹوٹ پھوٹ کا شکار ہو چکی ہے جبکہ ضلعی انتظامیہ اب تک ان سڑکوں کی مرمت کے نام پر کاغذوں میں کروڑوں روپے کے فنڈز خرچ کر چکی ہے لیکن ایک بھی سڑک کی مرمت دس پندرہ دن سے زیادہ قائم نہیں رہ سکی جس کی وجہ سے یہ سڑکیں کھنڈرات کا منظر پیش کر رہی ہیں دوسری جانب سرکاری خزانے سے کروڑوں روپے کے فنڈز صرف وہاڑی میں مختلف قسم کے ماڈلز کی تنصیب،سڑکوں پر لائنیں لگانے اور ڈیوائڈرز کو سڑکیں مرمت کئے بغیر رنگ روغن کروانے میں جھونک دیئے گئے ہیں ڈپٹی کمشنر وہاڑی کی بورے والا میں عدم دلچسپی اور یہاں کے مکینوں کو بے یار و مددگار چھوڑنے کی پالیسی اب ناقابل برداشت ہو چکی ہے شہریوں نے اس بدترین صورتحال پر وزیر اعلیٰ پنجاب سے فوری نوٹس لینے کا مطالبہ کیا ہے۔
About Author
