اسسٹنٹ کمشنر اور ایکسئین واپڈا نے فیکٹری میں ڈائریکٹ تاریں لگا کر بجلی چوری رنگے ہاتھوں پکڑ لی

بورے والا(چوہدری اصغر علی جاوید سے)اسسٹنٹ کمشنر اور ایکسئین واپڈا کی قیادت میں بجلی چوری ٹاسک فورس کا مجاہد کالونی میں چھاپہ،مصالحہ جات بنانے والی فیکٹری میں ڈائریکٹ تاریں لگا کر بجلی چوری رنگے ہاتھوں پکڑ لی،فیکٹری مالک کا بیٹا گرفتار،با اثر بجلی چور کا 40 سے زائد افراد کے ہمراہ واپڈا ٹیم پر حملہ،اسلحہ کے زور پر ایس ڈی او اور دیگر ملازمین کو اٹھا کر احاطے میں لیجا کر تشدد،واپڈا ٹیم کو یرغمال بنائے رکھا،تفصیلات کے مطابق انٹیلی جنس رپورٹ پر واپڈا ٹاسک فورس بورے والا نے اسسٹنٹ کمشنر رانا اورنگزیب اور ایکسئین میپکو ملک فیاض حسین کھوکھر کی قیادت میں ایس ڈی او رشید الرحمان و دیگر ٹیم نے پولیس کے ہمراہ مجاہد کالونی میں واقع ایک بااثر شخص شیر محمد عرف شیرا رحمانی کی مصالحہ جات،گلوکوز اور انرجائل بنانے والی فیکٹری پر چھاپہ مارا جہاں ڈائریکٹ تاریں لگا کر وسیع پیمانے پر بجلی چوری کی جا رہی تھی پولیس نے موقع سے فیکٹری مالک شیر محمد عرف شیرا کے بیٹے کو گرفتار کر لیا اسسٹنٹ کمشنر اور ایکسیئن واپڈا کے جانے کے بعد ایس ڈی او واپڈا رشید الرحمان اور انکی ٹیم تاریں اتارنے میں مصروف تھی کہ اسی اثناء میں شیر محمد عرف شیرا اپنے 40 سے 50 ساتھیوں کے ہمراہ آ گیا اسلحہ کے زور پر ایس ڈی او سمیت دیگر اہلکاروں کو اٹھا کر ایک احاطے میں لے گئے جہاں انہیں تشدد کا نشانہ بنایا اور گرفتار ملزم کی رہائی کیلئے یرغمال بنائے رکھا دھمکی دی کہ اسکے بیٹے کو چھوڑ دو پھر تمہیں رہا کریں گے واپڈا اہلکاروں نے منت سماجت کر کے رہائی حاصل کی ایس ڈی او میپکوکی طرف سے ملزمان کی اس غنڈہ گردی،ملازمین کو اغوا کر کے یرغمال بنانے اور تشدد کا نشانہ بنانے کے خلاف اندراج مقدمہ کی درخواست تھانہ سٹی میں دے دی گئی دریں اثناء اسسٹنٹ کمشنر رانا اورنگزیب اور ایکسئین میپکو ملک فیاض حسین کھوکھر نے میڈیا کو بتایا کہ بجلی چوری کی کاروائی پر فیکٹری مالک اور اسکے ساتھیوں کی جانب سے کی جانے والی غنڈہ گردی کسی صورت برداشت نہیں کی جائے گی بجلی چور قومی مجرم ہیں انکے ساتھ کسی قسم کی رعایت ہرگز نہیں برتی جائے گی کوئی کتنا بھی بااثر کیوں نہ ہو حکومتی رٹ کو چیلنج کرنے والوں کے خلاف سخت قانونی کاروائی کی جائے گی۔