تھانہ صدر میں بغیر رشوت کے مقدمہ درج کروانا علاقہ مکینوں کیلئے خواب بن گیا ہے۔ذوالفقار اعوان

بورے والا(چوہدری اصغر علی جاوید سے)پاکستان کسان اتحاد کے مرکزی کوآرڈینٹر ملک ذوالفقار اعوان نے کہا ہے کہ تھانہ صدر پولیس نے کرپشن کی انتہا کر دی،بغیر رشوت کے مقدمہ درج کروانا علاقہ مکینوں کیلئے خواب بن گیا ہے،کسان اتحاد کے ممبر محمد اسلم قادری نامی شخص کے گھر سے 50 ہزار مالیت کا بکرا چوری ہوا ملزم کا پتہ چل جانے کے بعد بکرے چوری کی درخواست پر چوکی انچارج 457 (ای بی) عامر شاہ نے اندراج مقدمہ کیلئے 10 ہزار روپے رشوت مانگ لی رشوت نہ دینے پر اے ایس آئی نے متاثرہ کسان کو غلیظ گالیاں نکالتے ہوئے دھکے دیکر وہاں سے نکال دیا اور کہا کہ ایس ایچ او تھانہ صدر کو پیسے دیئے بغیر تمہارا مقدمہ درج نہیں ہو گا،ان خیالات کا اظہار انہوں نے اپنے دفتر میں میڈیا سے گفتگو کرتے ہوئے کیا انہوں نے کہا کہ اس وقت تھانوں میں رشوت کا بازار گرم ہے انصاف کے حصول کیلئے مظلوم مارے مارے پھر رہے ہیں بااثر ملزمان نے پولیس سے ساز باز ہوکر مظلوم کیلئے انصاف کی فراہمی ناممکن بنا دی ہے ایسے بدتر حالات اس سے پہلے کبھی نہیں دیکھے راشی افسران کو کوئی پوچھنے والا نہیں کسان اتحاد ایک پرامن جماعت ہے اور پولیس کی ناانصافیوں نے ہمیں احتجاج پر مجبور کر دیا ہے ہم نہیں چاہتے کہ کسان انصاف کیلئے اب سڑکوں پر نکلیں اگر ہمیں مجبور کیا گیا تو حالات کی ذمہ داری پولیس انتظامیہ پر ہوگی اس موقع پر ندیم سجاد جٹ،محمد مہران علی،چوہدری شمشاد جٹ،چوہدری شبیر احمد،طاہر عباس کونسلر،بابر ڈوگر،عمران وڑائچ،چوہدری اصغر اور محمد بوٹا کے علاوہ دیگر بھی موجود تھے۔