ڈاکخانہ آفس میں جعلی اسلحہ لائسنس ٹکٹوں کی وسیع پیمانے پر فروخت کے بڑے سکینڈل کا انکشاف

بورے والا(چوہدری اصغر علی جاوید سے)جعلی اسلحہ لائسنس ٹکٹوں اور رسیدی ٹکٹوں کی وسیع پیمانے پر فروخت کے بڑے سکینڈل کا انکشاف،رسیدی اور اسلحہ لائسنس ٹکٹوں کی فروخت میں ملوث گروہ کے سرغنہ کی کارروائی پکڑی گئی،محکمہ ڈاک کے حکام نے فرضی ناموں کے ایڈریسوں پر ملک کے مختلف شہروں کو رجسٹریوں کے ذریعہ جعلی ٹکٹوں کی فروخت کا دھندہ بے نقاب کر دیا،50ہزار روپے کے اسلحہ لائسنس ٹکٹوں کا پیکٹ پکڑا گیا،تفصیلات کے مطابق بورے والا شہر میں عرصہ دراز سے جعلی اسلحہ لائسنس اور رسیدی ٹکٹوں کی فروخت کا دھندہ جاری تھا جعل سازوں کا منظم گروہ کروڑوں روپے کی جعلی ٹکٹیں تیار کر کے یہاں سے انتہائی کم قیمت پر مختلف شہروں کے ڈاکخانوں میں موجود اپنے ایجنٹوں کو فروخت کرتا آرہا تھا متعدد بار ان جعلی ٹکٹوں کی فروخت کے دھندے بارے محکمہ ڈاک کے اعلیٰ حکام کو شکایت کی جاتی رہیں لیکن گروہ اتنا بااثر ہے کہ ان کے خلاف آج تک کوئی کارروائی یا انکوائری نہ کی جا سکی تا ہم گذشتہ روز حسب معمول گروہ کے سرغنہ حاجی اشرف نامی شخص نے ڈاکخانہ کچہری سے شاہد فوٹو سٹیٹ سروس ریلوے روڈ دنیا پور ضلع لودھراں کے نام ایک رجسٹری بک کروائی اور اس رجسٹری پر بھیجنے والے ایڈریس میں اپنے بیٹے عدیل سکنہ احاطہ شاہ نواز کا نام درج کیا تھا اس رجسٹری پر شک گزرتے ہی متعلقہ پوسٹ ماسٹر محمد ارشد نے اسکی اطلاع فوری طور پر محکمہ کے اعلیٰ افسران کو کر دی جس پر اگلے روز محکمہ کے افسران پر مشتمل ٹیم نے بورے والا پہنچ کر رجسٹری کو کھولا تو اس میں سے 50ہزار روپے مالیت کے 2015 کے اسلحہ لائسنس ٹکٹ برآمد ہوئے جس کی رپورٹ ٹیم نے اعلیٰ حکام کو ارسال کر دی محکمہ ڈاک نے اس بڑے سکینڈل کے بے نقاب ہونے پر اعلیٰ سطحی تحقیقات کا آغاز کر دیا ہے اس سلسلہ میں جب محمد اشرف سے رابطہ کیا گیا تو اس نے پہلے رجسٹری بک کروانے کے بارے تسلیم کیا اور کہا کہ یہ تو 2015 کی ٹکٹیں ہیں یہ کسی کے کام کی نہیں اسکے بعد اس نے رجسٹری بک کروانے سے لاتعلقی کا اظہار کر دیا اور کہا کہ محکمہ نے انکوائری کیلئے بلایا ہے انکوائری کمیٹی کو اپنا بیان دونگا۔