کسان اتحاد نے واپڈا افسران کے ناروا رویہ کے خلاف 3 اپریل کو دھرنے کا اعلان کر دیا

بورے والا(چوہدری اصغر علی جاوید سے)پاکستان کسان اتحاد نے واپڈا افسران کے ناروا رویہ،کسانوں پر جھوٹے مقدمہ،ماہانہ لاکھوں یونٹ بجلی چوری کرنے،کسانوں مزدوروں کا معاشی استحصال کے خلاف 3 اپریل کو واپڈا دفاتر کے گھیراﺅ اور دھرنے کا اعلان کر دیا،پاکستان کسان اتحاد کے مرکزی کوآرڈینٹر و ضلعی صدر ملک ذوالفقار احمد اعوان نے اپنے دفتر میں منعقدہ ہنگامی اجلاس سے خطاب کرتے ہوئے کہا کہ کسان اور مزدور کے کروڑوں روپے کے ٹیکسوں سے تنخواہیں لینے والے واپڈا اہلکار دفاتر میں بیٹھ کر فرعون بنے ہوئے ہیں،واپڈا ملازمین و افسران کے گھروں میں فری سپلائی کے نام پر گرڈ اسٹیشن بنا کر ماہانہ لاکھوں یونٹ بجلی چوری کی جا رہی ہے بجلی چوری کے ذمہ دار واپڈا اہلکار اور افسران خود ہیں ماہانہ لاکھوں یونٹس کی بجلی چوری کے لائن لاسسز کسانوں اور مزدوروں سے ڈیٹکشن کے نام پر وصول کر کے کرپشن اور بدعنوانی کے تمام سابقہ ریکارڈ توڑ ڈالے ہیں اور دفاتر میں بیٹھے افسران و اہلکاروں کا رویہ صارفین سے انتہائی ہتک آمیز ہے ان شکایات کے ازالہ اور کسانوں کے خلاف درج دہشت گردی کے جھوٹے مقدمہ کے اخراج بارے انتظامیہ اور وزراء سےاب تک ہونے والے مذاکرات بے سود رہے ہیں اب واپڈا کی بدعنوانیاں،کسانوں و مزدوروں کا معاشی استحصال اور نامناسب رویہ ناقابل برداشت ہو چکا ہے کسان اور مزدور 3 اپریل کو اپنے ساتھ ہونیوالی ان زیادتیوں کے خلاف سروں پر کفن باندھ کر واپڈا کے دفاتر کا گھیراﺅ کریں گے پورا ضلع جام کر کے پرامن احتجاجی دھرنا دیا جائے گا جوشکایات کے ازالہ تک جاری رہے گا اجلاس سے خطاب کرتے ہوئے ملک ذوالفقار اعوان نے مذید کہا کہ واپڈا کے دفاتر میں کئی کئی سالوں سے تعینات کرپٹ اور شرپسند عناصر اپنی اجارہ داری قائم کر کے واپڈا کو یرغمال بنائے ہوئے ہیں اور انکی بدعنوانیوں کی وجہ سے عوام میں حکومت کے خلاف ایک نفرت پیدا ہو رہی ہے یہی لوگ حکومت اور ادارہ کی بدنامی کا باعث بننے کے علاوہ عوام اور اداروں کے مابین کشیدگی پیدا کرنے کے ذمہ دار ہیں اگر حکومت نے 24 گھنٹوں میں ان کرپٹ واپڈا افسران و اہلکاروں جو کہ کئی سالوں سے پرکشش سیٹوں پر بیٹھ کر صارفین کا خون نچوڑ رہے ہیں انکو تبدیل کر کے ان کے گھروں میں بنے منی گرڈایشن بند نہ کیے تو ہزاروں کسان بھر پور احتجاج کریں گےاجلاس میں ندیم سجاد،محمد مہران،چوہدری اصغر،یٰسین جملیرا،عمران وڑائچ،عباس،محمد بوٹا،مجید سکھیرا،رضا وڑائچ،فوجی امین،چوہدری مشتاق،چوہدری شفیق،محمد آصف،شمشاد علی آف مرضی پورہ کے علاوہ دیگر کسان بھی موجود تھے۔