محکمہ پبلک ہیلتھ کی مجرمانہ غفلت سے 34کروڑ روپے نکاسی آب کا منصوبہ تباہی کی نظر ہو گیا
بورے والا(چوہدری اصغر علی جاوید سے)ناقص منصوبہ بندی،غیر معیاری میٹریل اور محکمہ پبلک ہیلتھ کی مجرمانہ غفلت سے 34کروڑ روپے نکاسی آب کا منصوبہ تباہی کی نظر ہو گیا،22کروڑ کی رقم خرچ ہونے کے باوجود چار سال بعد بھی منصوبہ تاخیر کا شکار،ٹھیکیدار نے شہر کے مختلف علاقوں میں پائپ بچھانے کیلئے خندقیں کھود کر چھوڑ دیا،آمدورفت متاثر ہونے کے علاوہ دھول اڑنے سے شہریوں کا ناک میں دم،محکمہ پبلک ہیلتھ کے افسران بھاری کمیشن لیکر خاموش،تفصیلات کے مطابق سابقہ دور حکومت میں شہر میں نکاسی آب کے حوالہ سے 34کروڑ روپے کی لاگت سے 2014میں شروع ہونے والا میگا پراجیکٹ ناقص منصوبہ بندی،غیر معیاری میٹریل،کمیشن مافیا اور محکمہ پبلک ہیلتھ کے افسران کی مبینہ ملی بھگت سے 22کروڑ روپے کی خطیر رقم خرچ کر کے بھی کسی ایک علاقے کو بھی ریلیف نہ دے سکا بلکہ ٹھیکیدار نے اس منصوبے کو ٹکڑے ٹکڑے کر کے پورے شہر میں بڑے پائپ بچھانے کیلئے خندقین کھود کر شہریوں کو دوہرے عذاب میں مبتلا کر دیا ہے کسی بھی علاقے میں شروع کیے گئے اس منصوبے کو مکمل کر کے عوام کو مرحلہ وار ریلیف پہنچانے کی بجائے غلط پلاننگ سے بنائے گئے نقشہ کی آڑ میں اپنی مرضی سے پورے شہر کو کھنڈر بنا دیا ہے اس منصوبے میں بچھائے گئے پائپ انتہائی ناقص اور غیر معیاری ہونے کے علاوہ کئی جگہوں سے شکستہ پائپ بھی زیر زمین بیڈ بنائے بغیر زیر زمین مٹی میں دبا دیئے ہیں اسکے گرد دھول اڑاتے مٹی کے ڈھیر عوام کیلئے عذاب سے کم نہیں متعدد مقامات پر پائپ بچھانے کیلئے کھودی گئی خندقیں اب آمدورفت میں بھی رکاوٹ بنی ہوئی ہیں 22کروڑ روپے کی خطیر رقم ناقص میٹریل،غلط منصوبہ بندی،محکمہ کے افسران کے کمیشن اور کرپشن کی وجہ سے زمین بوس ہو چکی ہے اس میگا پراجیکٹ کی تکمیل میں تاخیر اور اس میں ہونے والی مبینہ کرپشن کے ذمہ داروں کا تاحال تعین نہیں ہو سکا بلکہ کئی افسران اپنا حصہ وصول کر کے ٹرانسفر بھی ہو چکے ہیں اس میگا پراجیکٹ میں ہونے والی مبینہ کرپشن ناقص منصوبہ بندی اور محکمہ پبلک ہیلتھ کی مجرمانہ غفلت پر سول سوسائٹی نیٹ ورک بورے والا کے عہدیداران عبدالرﺅف چوہدری،اصغر علی جاوید،محمد شیر خاں کھچی،سجاد حسین بخاری،عدیل مختار،چوہدری احتشام داﺅد اور دیگر عہدیداران نے سیکرٹری پبلک ہیلتھ اور دیگر اعلیٰ حکام کو تحقیقات کا مطالبہ کیا ہے۔
About Author
