درجنوں غیر قانونی ہاﺅسنگ کالونیوں کے خلاف نیب نے تحقیقات شروع کر دیں

بورے والا(چوہدری اصغر علی جاوید سے)درجنوں غیر قانونی ہاﺅسنگ کالونیوں کے خلاف نیب نے تحقیقات شروع کر دیں،غیر قانونی کالونیوں کے مالکان کی طرف سے کنڈونیشن فیس کی مد میں اربوں روپے کی خوردبرد کا انکشاف،محکمہ واپڈ نے بلدیہ کے این او سی کے بغیر متعدد کالونیوں میں بجلی کے غیر قانونی کنکشن فراہم کر دئیے،محکمہ ریونیو نے پابندی کے باوجود بعض کالونیوں کی رجسٹریاں بھی کر دیں،اعلیٰ سطحی تحقیقات میں مذید انکشافات کا امکان،انتہائی معتبر ذرائع کے مطابق بورے والا میں واقع غیر قانونی ہاﺅسنگ کالونیوں کے متعلق نیب نے اعلیٰ سطحی تحقیقات کا آغاز کر دیا ہے،ذرائع کے مطابق ان کالونیوں کو گذشتہ کئی سالوں سے بلدیہ بورے والا نے غیر قانونی قرار دیکر محکمہ ریونیو،محکمہ واپڈا،سوئی گیس،پبلک ہیلتھ و دیگر ترقیاتی اداروں کو آگاہ کر رکھا تھا کہ ان کالونیوں کے نقشہ جات بلدیہ سے منظور نہیں کروائے گئے اور متعدد کالونی مالکان نے نقشہ جات کی منظوری کے لیے فائلیں جمع کروانے کے بعد انکی منظوری اور فیسیں جمع کروانے کیلئے تحرک نہیں کیا ان ہاﺅسنگ کالونیوں میں بجلی کی فراہمی کے علاوہ کوئی بھی ترقیاتی کام نہیں کروائے جاسکتے جبکہ اس دوران کئی غیر قانونی کالونیوں جن کی رجسٹریوں پر پابندی عائد کر رکھی تھی ان میں سے متعدد کالونیوں کے مالکان نے محکمہ ریونیو کی مبینہ ملی بھگت سے زرعی رقبہ ظاہر کر کے پلاٹ فروخت کرتے ہوئے انکے انتقال بھی کروا لیئے جس سے سرکاری خزانے کو کنڈونیشن کی مد میں اربوں روپے کا ٹیکہ لگ چکا ہے ذرائع نے یہ بھی بتایا کہ غیر قانونی قرار دئیے جانے کے باوجود محکمہ واپڈا سمیت دیگر کئی اداروں نے بجلی،سوئی گیس اور سیوریج سمیت کئی غیر قانونی ترقیاتی کام بھی کروا دئیے ہیں ان کالونیوں میں اربوں روپے کے پلاٹ خریدنے والے اندرون اور بیرون ملک مقیم پاکستانی اپنی جمع پونجی ان مالکان کے حوالے کرنے کے باوجود تاحال مطلوبہ سہولیات سے محروم ہیں بعض کالونیاں مکمل طور پر فروخت بھی ہو چکی ہیں اس حوالہ سے نیب نے تحقیقات کادائرہ وسیع کردیا ہے اور ان میں مزید کئی بےضابطگیاں سامنے آنے والی ہیں۔