تحصیل ہیڈ کوارٹر ہسپتال بورے والا مبینہ کرپشن اور بے ضابطگیوں کا گڑھ بن گیا
بورے والا(چوہدری اصغر علی جاوید سے)تحصیل ہیڈ کوارٹر ہسپتال بورے والا مبینہ کرپشن اور بے ضابطگیوں کا گڑھ بن گیا،مریض ادویات اور طبی سہولتوں سے محروم ہو کر رہ گئے،میڈیکل سپرٹینڈنٹ مافیا کے آ گے بے بس،تفصیلات کے مطابق سابق دور حکومت میں تحصیل ہیڈ کوارٹر ہسپتال کا ایمرجنسی بلاک اور دفاتر کی تزئین و آرائش کی وجہ سے ایک سال سے اکھاڑ بچھاڑ کا شکار ہے انتظامیہ کی طرف سے ہسپتال میں کینٹین کی عمارت میں عارضی طور پر ایمرجنسی یونٹ کو شفٹ کیا گیا ہے جس کے آگے سائیکل سٹینڈ کے ٹھیکیدار نے ہسپتال کے ذمہ داران افسران کی مبینہ ملی بھگت سے معاہدہ کے برعکس سارے پلاٹ کو سائیکل سٹینڈ میں تبدیل کر کے ایمرجنسی یونٹ کی افادیت کو ناکارہ کر دیا ہے رات کے وقت ایمرجنسی آنے والے نووارد مریض اور ان کے لواحقین ایمرجنسی تک رسائی نہ ہونے کی وجہ سے مایوس ہو کر پرائیویٹ ہسپتالوں کا رخ کرنے پر مجبور ہیں ہسپتال میں ادوایات کے لیے 5کروڑ سے زائد کے سالانہ بجٹ کے باوجود شوگر اور دیگر امراض کی ادویات ختم ہیں ڈسپنسری عملہ معذرت کر کے مریضوں کو جواب دے دیتا ہے اس طرح لوکل پرچیز کی مد میں بھی ادویات کا ریکارڈ خفیہ رکھا جا رہا ہے اس سلسلہ میں ہسپتال کے میڈیکل سپرٹینڈنٹ ڈاکٹر امجد شکیل سے رابطہ کیا گیا تو وہ اس سلسلہ میں تسلی بخش جواب نہ دے سکے انہوں نے تسلیم کیا کہ شوگر سمیت کئی امراض کی ادویات واقعی ختم ہیں جن کے بارے میں محکمہ صحت کو اطلاع دی جا چکی ہے اسی طرح سائیکل سٹینڈ اور دیگر بے ضابطگیوں کے بارے میں ہسپتال کے ایڈمن آفیسر عمر بھی جواب دینے میں لیت و لعل کرتے رہے ہسپتال میں موجود مریضوں نے بتایا کہ انہیں ادویات بھی نہیں ملتی اور سائیکل سٹینڈ کے ٹھیکیدار کی چیرہ دستیوں اور اوورچارجنگ پر دن رات مریضوں کے لواحقین کی بے عزتی کی جاتی ہے باقاعدہ مقرر ریٹوں کو نمایاں جگہ پر آویزاں نہیں کیا گیا انجمن بہبودی مریضاں اور مرکزی انجمن تاجران کے صدر محمد جمیل بھٹی اور جنرل سیکرٹری صغیر احمد رامے نے ہسپتال میں ادویات کی نایابی اور سائیکل سٹینڈ ٹھیکیدار کی ناجوازیوں پر سخت رد عمل کا اظہار کرتے ہوئے ڈپٹی کمشنر وہاڑی اور محکمہ صحت کے حکام سے اصلاح احوال کا مطالبہ کیا ہے۔
About Author
