ریلوے لائن سے ملحقہ پختہ سڑک کو ٹھیکیدار سیوریج سکیم نے تہس نہس کر دیا،شہری شدید پریشان

بورے والا(چوہدری اصغر علی جاوید سے)ریلوے لائن سے ملحقہ پختہ سڑک کو ٹھیکیدار سیوریج سکیم نے تہس نہس کر دیا،سیوریج لائین بچھانے کیلئے ساری مٹی پختہ سڑک پر پھینک کر اسکا نام و نشان مٹا دیا،ضلعی و تحصیل انتظامیہ کی چشم پوشی،شہری شدید پریشان،تفصیلات کے مطابق بورے والا میں کروڑوں روپے کی لاگت سے نئی مین سیوریج لائن بچھانے کا منصوبہ شہریوں کے لئے عذاب بن گیا ٹھیکیدار نے اس مین لائن بچھانے کیلئے حبیب کالونی،معصوم شاہ روڈ،بھٹہ یوسف آباد اور دیگر آبادیوں کو شہر سے ملانے والی ریلوے روڈ جو کہ روزانہ ہزاروں لوگوں کی گزرگاہ ہے کو مٹی کا ڈھیر بنا دیا ہے نکاسی آب کے پائپ ڈالنے کیلئے کی جانے والی کھدائی کی مٹی سڑک پر ڈال دی گئی ہے اور منصوبہ مکمل کر کے ٹھیکیدار اس سڑک کو اسی حالت میں چھوڑ کر غائب ہو گیا جس سے شہریوں کر اس ریلوے روڈ سے گزرنا پل صراط عبور کرنے کے مترادف ہوچکا ہے سول سوسائٹی کے نمائندہ افراد سید سجاد حسین بخاری،سید زاہد حسین مشہدی،عدیل مختار ایڈووکیٹ،محمد شیر خاں کھچی،ضلعی صدر مسلم لیگ(ن) یوتھ ونگ منظور برکت ماڑی والا،محمد لطیف خلجی اور دیگر نمائندہ شہریوں نے ٹھیکیدار اور متعلقہ محکموں کی اس مجرمانہ غفلت کا فوری نوٹس لینے کا مطالبہ کیا ہے۔