پارٹی قیادت نے جعلی ڈگری پر تاحیات نااہل شخص کو ٹکٹ دیکر پارٹی کا مذاق اڑوایا۔خالد چوہان
بورے والا(چوہدری اصغر علی جاوید سے)ضلعی صدر تحریک انصاف و امیدوار قومی اسمبلی چوہدری خالد محمود چوہان نے کہا ہے کہ پی ٹی آئی قیادت نے پی پی229 سے جعلی ڈگری پر تاحیات نااہل شخص نذیر جٹ کو ٹکٹ دیکر پارٹی کا مذاق اُڑوایا ہے،سپریم کورٹ سے نااہل ہونے والے شخص نے پارلیمانی بورڈ کو اپنی نااہلی کا بتائے بغیر ٹکٹ پارٹی ورکرز سے چھین لیا ہے ہم نے پارٹی کو ضلع بھر میں ناقابل تسخیر قوت بنانے میں کوئی کسر اُٹھا نہیں رکھی اور کارکنان کے جذبات کی ترجمانی کی ہے اور پارٹی کیلئے قربانیاں دینے والے اب کسی خانہ بدوش اور پیراشوٹر سرمایہ دار اور اُسکے خاندان کو بورے والا پر مسلط نہیں ہونے دیں گے ہم نے عمران خان کے نظریے کی نفی کرنے والے ایسے بدزبان شخص کا ہر قیمت پر راستہ روکنا ہے،ان خیالات کا اظہار انہوں نے کاغذات نامزدگی کی جانچ پڑتال کے بعد میڈیا سے گفتگو کرتے ہوئے کیا اس موقع پر تحصیل صدر طارق محمود باجوہ،چوہدری محمد شفیق گجر،چیئرمین یوسی چوہدری ارشاد احمد چوہان اور دیگر راہنما بھی موجود تھے چوہدری خالد محمود چوہان نے کہا کہ ہم نے ٹکٹوں کی غیر منصفانہ تقسیم کے خلاف عمران خان کو اپنے تحفظات سے آگاہ کر دیاہے اور جن لوگوں کو ٹکٹ جاری کیے گئے ہیں اُنکی سابقہ سیاسی قلابازیوں اور کارکنان کے ساتھ اُنکے رویہ بارے بھی تفصیلات فراہم کر دی ہیں اور ہمیں امید ہے کہ پارٹی چیئرمین کارکنان کے جذبات اور اُنکی قربانیوں کو سامنے رکھ کر ٹکٹوں کے فیصلہ پر نظرثانی کریں گے۔
About Author
