شہباز شریف کے ہاتھوں شروع کیا گیا ٹی ایچ کیو ہسپتال کی اپ گریڈیشن کا منصوبہ مکمل نہ ہو سکا

بورے والا(چوہدری اصغر علی جاوید سے)سات سال قبل شہباز شریف کے ہاتھوں شروع کیا گیا تحصیل ہیڈ کوارٹر ہسپتال کی اپ گریڈیشن کا منصوبہ مکمل نہ ہو سکا،فنڈز کی عدم فراہمی کے باعث منصوبہ تعطل کا شکار،منصوبہ مکمل نہ ہونے سے عوام کو طبی سہولتوں کی فراہمی میں مشکلات،روزانہ سینکڑوں مریض دھکے کھانے پر مجبور،تفصیلات کے مطابق 2011 میں میاں شہباز شریف نے بطور وزیر اعلیٰ تحصیل ہیڈ کوارٹر ہسپتال بورے والا کی اپ گریڈیشن کے منصوبے کا سنگ بنیاد رکھا جو کہ دو سال میں مکمل ہونا تھا لیکن حکومت کی ناقص پالیسیوں اور فنڈز کی عدم فراہمی کی وجہ سے اُنکے سابقہ دور میں بھی یہ منصوبہ پایہ تکمیل کو نہ پہنچ سکا 60بیڈ کے اس ہسپتال کو 150بیڈ کا ہسپتال بنانے کا یہ خواب بھی (ن)لیگ کی حکومت پورا نہ کر سکی اس منصوبہ کی عدم تکمیل کے باعث ہسپتال کی ناکافی بلڈنگ مریضوں کے غیر معمولی رش کی وجہ سے انہیں طبی سہولتیں فراہم کرنے میں ناکام ہو چکی ہے ہسپتال میں بیڈ نہ ہونے سے مریضوں کو داخل کرنے کی بجائے وہاڑی اور ملتان کے ہسپتالوں میں ریفر کر دیا جاتا ہے جبکہ ڈاکٹرز اور عملہ کے بیٹھنے کی جگہ بھی میسر نہیں روزانہ سینکڑوں مریض اپ گریڈیشن بلڈنگ کی عدم تکمیل کے باعث دھکے کھانے پر مجبور ہو چکے ہیں مقامی شہریوں سید سجاد حسین بخاری،غلام مصطفےٰ بھٹی،چوہدری اعجاز اسلم،شہزاد مصطفےٰ چوہان،حاجی عبدالغفور،محمد شیر خاں کھچی اور دیگر نمائندہ شہریوں نے نگران حکومت سے فنڈز کی عدم فراہمی اور بلڈنگ کی عدم تکمیل کا فوری نوٹس لینے کا مطالبہ کیا ہے۔